Dy persona janë vënë në pranga si pjesë e një grupi që shpërndante lëndë narkotike në doza, duke sekuestruar edhe municion luftarak.
“Apollonia” u kodua operacioni i policisë së Fierit, ku pas një pune hetimore, mbrëmjen e së enjtes, u godit një grup që shpërndante lëndë narkotike në doza, në qytetin e Fierit.
Gjatë operacionit u bë arrestimi në flagrancë i E. M., 23 vjeç, banues në Fier dhe O. L., 17 vjeç, banues në Fier.
Dy të rinjtë u kapën në flagrancë duke shitur lëndë narkotike, në bashkëpunim me njëri tjetrin, në lagjen “Apollonia”.
Si rezultat i operacionit, gjatë kontrollit personal dhe nga kontrolli i ushtruar në banesat e këtyre shtetasve, u gjetën dhe u sekuestruan në cilësinë e provës materiale 14 doza me lëndë narkotike e dyshuar kanabis sativa dhe fishekë pistolete.
Ndaj të dyshuarve hetimet janë në vijim, për veprat penale “Prodhimi dhe shitja e lëndëve narkotike” e kryer në bashkëpunim, “Nxitja për përdorimin e drogës” dhe “Mbajtja pa leje e municionit luftarak”.
/a.r
