Brenda pak muajsh nga marrja e detyrës, Bashkia e Tiranës ka nisur të bëj realitet një tjetër premtim, zgjidhjen e problemit të hipotekimit të pallateve që për arsye të ndryshme nuk kishin mundur të regjistroheshin në Zyrën e Regjistrimit të Pasurive të Paluajtshme.
Kryetari i Bashkisë së Tiranës, Erion Veliaj dhe Ministri i Drejtësisë, Ylli Manjani kanë shpërndarë sot certifikatat e para të pronësisë për 1352 familje që kanë apartamentet e tyre në 14 pallate. Në fjalën e tij kreu i Bashkisë së Tiranë e ka cilësuar këtë një moment historik për qytetin e Tiranës pasi nis t’i jepet zgjidhje një problemi të mbartur prej vitesh dhe që administrata e mëparshme pavarësisht premtimeve nuk kishte arritur të bënte asgjë. Ai solli në vëmendje se ish – kryebashkiaku Lulzim Basha kishte premtuar para 5 vitesh se do t’i jepte hipotekat e pallatave brenda gjashtë muajve, por nuk bëri asnjë gjë.
“Lajmi i mirë nuk është udhëzimi, lajmi i mirë është rezultati dhe rezultati është që sot ne fillojmë me 20 pallatet e para për 1352 familje në Tiranë. 14 pallate të cilat janë sot me një vlerë rreth 140 milionë euro, siç i kemi llogaritur, të cilat sot marrin vlerë në treg”, tha kryetari i Bashkisë Erion Veliaj.
Ai theksoi gjithashtu se pavarësisht vështirësive dhe pro që hasen në teren nga abuzimet e shumta që kanë bërë ndërtuesit, Bashkia e Tiranës është e vendosur që të përballet me këtë problem dhe t’i japë qytetarëve mundësinë që t’i japin vlerë pronës së tyre.
“Pas shpërndarjes së certifikatave, të këtyre hipotekave sot, secili mund të shkojë në një bankë dhe të marrë një kredi në të njëjtën vlerë siç është pallati. Secili mund ta trajtojë këtë për një investim tjetër, mund ta japë me qira, mund ta vendosë si kolateral në një marrëveshje dhe besoj që sot duke çliruar këtë lloj energjie ne besoj se kemi dhënë një fuqizim shumë të nevojshëm për ekonominë e Tiranës sot. Të mbash peng pallatet në Tiranë do të thotë që të mbash peng ekonominë dhe mos zhvillosh këto prona të cilat sot banohen nga njerëz”, u shpreh Veliaj.
Ndërsa Ministri Drejtësisë, Ylli Manjani theksoi se udhëzimi i miratuar në qeveri shmang mundësinë që një pronë të shitet më shumë se 1 personi dhe gjithashtu i kalon barrën e përgatitjes së dokumentacionit institucioneve shtetërore. Në total llogariten që në gjithë Tiranën janë rreth 300 pallate me mbi 20 mijë apartamente të pahipotekuara. (javanews.al / a.r)
