Kryetari i Partisë Socialiste të Tiranës Saimir Tahiri dhe Drejtori i Përgjithshëm i ALUIZNI-t Artan Lame kanë shpërndarë rreth 300 leje legalizimi për banorët e zonës së Kombinatit në kryqytet. Tahiri akuzoi opozitën se po përpiqet të mbajë peng shqiptarët.
”E nëqoftëse ti je shqiptari i zakonshëm që pret me padurim legalizimin, ajo ‘çadra’ ta largon akoma më shumë. Nëse ti je shqiptari i zakonshëm që pret një punë më të mirë, ajo ‘çadra’ ta largon më shumë. Nëse ti je njeriu që ke ndërtuar një jetë me sakrificë dhe pret që fëmijët e tu të shkollohen, që nesër të kenë një punë më të mirë, ajo ‘çadra’ dhe të gjithë ata që duan ta mbajnë Shqipërinë peng t’i largojnë më shumë ëndrrat”, theksoi kreu i PS-së Tiranë.
Duke shpërndarë lejet e legalizimit banorëve të Kombinatit, Tahiri deklaroi se vetëm gjatë këtyre viteve janë bërë 6 deri në 7-fish më shumë legalizime se çfarë janë bërë gjatë 8 viteve në kohën e Berishës, ndërkohë që brenda 4-vjeçarit të ardhshëm, tha ai, ky proces do të përfundojë në të gjithë Shqipërinë.
”Çdo legalizim që kemi bërë sot është një borxh që ja kemi ju a kemi kthyer. Një borxh që e kemi mbajtur ne në kurriz edhe për llogari të atyre që kanë qeverisur 25 vite dhe që sot ju a rikthejmë jo për të na thënë ju faleminderit ne, por për tu thënë ne faleminderit ju’,’ theksoi ndër të tjera Saimir Tahiri./a.m.
