Janë në total rreth 42 njësi policore, pjesë e strukturave të Policisë së Shtetit, përfituese të shpërblimeve të ndryshme të akorduara nga kreu i policisë Haki Çako. Rreth 700 efektivë të policisë mund të përfitojnë nga 1 deri në 6 paga shpërblim, por që ende ato nuk janë marrë.
Në njësitë përfituese të shpërblimit përfshihen komisariatet, drejtoritë vendore të Forcave Speciale, si dhe struktura të hetimit të krimeve në Policinë e Shtetit.
Shpërblimet janë përfituar në operacione relativisht të vështira, si ngjarja e Lazaratit ku mbeti i vrarë efektivi i Policisë Ibrahim Basha, apo operacioni antidrogë i koduar “Xibraka” i zhvilluar në Elbasan.
Po kështu efektivët e policisë pjesëmarrës në operacione si ato antikanabis të kryera në Dukagjin, ai i kapjes së vrasësit të turistëve çekë, apo edhe të tjera me rrezikshmëri të lartë, nuk kanë mundur të marrin shpërblimet e akorduara.
Burime nga Policia e Shtetit thanë për Shqiptarja.com se fondi i veçantë i Policisë që përdoret për shpërblimet, duhet miratuar me VKM, pas propozimit të ministrit të Financave dhe atij të Brendshëm.
Ndërkohë burime nga Ministria e Financave thanë se nuk ka mbërritur asnjë propozim për të kaluar në qeveri për miratim. Sipas tyre, Ministria e Brendshme ka fondin e posaçëm të saj ndërsa i duhet të bëjë edhe propozimet përkatëse.
Një situatë e tillë duket se ka ndodhur për shkak se fondet nuk menaxhohen në mënyrë të drejtpërdrejtë nga kreu i Policisë së Shtetit, por duhen miratuar më parë me një vendim qeverie pas propozimeve përkatëse.
