275 mijë familje në nevojë pritet të marrin shpërblim 15 mijë lekë në këtë fundvit. Qeveria ka miratuar fondin, ndërsa ministrja e Shëndetësisë dhe Mbrojtjes Sociale Albana Koçiu tha se do të ndihmohen fëmijët pa prindër, para dhe tetraplegjikët, personat që nuk shikojnë dhe kujdestarët e tyre.
Kryebashkiaku i Vlorës, Ermal Dredha theksoi se nga këto 4250 familje përfituese janë në Vlorë.
“Janë 4 shtresa që përfitojnë nga kjo skemë që ka aprovuar qeveria. Në Vlorë janë 4250 familje, përfshihen personat invalidë, të verbërit, tetraplegjikët dhe personat me aftësi ndryshe. Jemi gjithmonë në mbështetje me ndihma që miratohen thuajse çdo muaj në këshillin bashkiak, e orientuar drejt politikave dhe ligjeve që janë në fuqi në republikën e Shqipërisë.”, u shpreh ai.
Kryetari i bashkisë së Vlorës u ndal edhe te projektet në qytetin bregdetar.
“Projekte ka pasur shumë këtë vit në Vlorë. Ka filluar shumica e projekteve. Bulevardi i Portokalleve me Fondin Shqiptar të Zhvillimit. Kemi mbaruar një shkollë 8 vjeçare ndërkohë që kemi nisur një tjetër. Shpresojmë që deri në fillim të vitit të ri akademik të jetë gati. Investime edhe në pjesën e kanalizimeve dhe ujit të pijshëm. Sfida është landfilli i Sherishtës. Shpresojmë që në janar ta nisim.”, u shpreh Dredha.
