Shoqërohet në polici vëllai i ministrit Lefter Koka. Leonard Koka, vëllai i ministrit të Mjedisit, Lefter Kokës, është shoqëruar sot rreth orës 13:15 në policinë e Durrësit dhe është mbajtur në komisariat për rreth 5 orë.
Ai akuzohet për ‘Kundërshtim të forcave të policisë’, gjë të cilën nuk e ka pranuar. Mësohet se shkak i shoqërimit është bërë konflikti i djalit të tij me një punonjës policie, pas një gjobe.
Ai është gjobitur nga policia rrugore për një kundravajtje rrugore. Kjo, pasi sipas policisë Renald Koka ishte me shpejtësi tej normave dhe pa dokumentacionin e duhur. Djalit të Leonard Kokës iu hoq leja e drejtimit nga patrulla e qarkullimit.
Pasi ka marrë vesh për shoqerimin e djalit, Leonard Koka ka shkuar vetë në polici, dalë në mbrojtje të të birit duke u konfliktuar verbalisht me policët e rrugores.
Kjo ka bërë që blutë ta shoqërojnë atë, së bashku me të birin, në komisariatin e policisë së Durrësit për kundërshtim të forcave të rendit.
Pasi doli nga policia Koka tha për “BalkanWeb” se ai është shoqëruar për të tërhequr vëmendjen e opinionit publik dhe medias nga trafiku i drogës.
“Unë nuk kam kundërshtuar asnjë punonjës policie. Dua të them që Perlat Çullhaj më ka shoqëruar vetëm për të tërhequr vëmendjen nga droga që ka kaluar në kufi. Ma ka bërë edhe një vit më parë. Sa herë kalojnë 2-3 tonë drogë në kufi më shoqërojnë mua për të tërhequr vëmendjen e mediave dhe opinionit publik. Nuk habitem po të më shoqërojnë prapë”, deklaroi Koka.
Leonard Koka është vëllai i ministrit të mjedisit, Lefter Koka. Leonard Koka njihet edhe si personi që ndërmjetësoi marrëvëshjen mes PS-së dhe LSI-së 4 vjet më parë.
a.ç
