Protesta kundër ndërtimit të një këndi lojërash tek parku i liqenit Artificial të Tiranës është shoqëruar me përplasje fizike mes protestuesve dhe policisë.
Mësohet se sot shoqëria civile ka dalë sërish në protestë për të kundërshtuar projektin e Bashkisë së Tiranës, ndërsa protestuesit kanë prishur gardhin rrethues, tek zona ku është planifikuar ndërtimi i parkut. Sipas të dhënave paraprake, bëhet e ditur se 6 persona janë shoqëruar në polici, ndërsa mësohet se njëri prej tyre është Elian Tanini.
Sakaq, forca të shumta policore ndodhen aktualisht tek kodrat e Liqenit, për të mbarëvajtur situatën. Gjatë kësaj jave ka pasur një debat të gjatë publik lidhur me ndërtimin e parkut të fëmijëve tek Liqeni Artificial. Gjithçka nisi javën e shkuar, kur Kryetari Bashkisë Erion Veliaj deklaroi se tek zona e Liqenit Artificial në Tiranë janë identifikuar disa pemë jo të shëndetshme, që do të priten për ti dhënë jetë një parku fëmijësh. Opozita, Partia Demokratike dhe Shoqëria Civile janë shprehur kundër këtij vendimi.
Diskutimet kanë qenë të shumta dhe protestat kanë nisur që në fillim të kësaj jave, ku komponent të Partisë Demokratike, por dhe shoqërisë civile kanë prishur gardhin rrethues të zonës ku do ndërtohej parku. Bashkia e ka rivendosur atë, teksa sot shoqëria civile kishte paralajmëruar një protestë tjetër dhe tashmë mësohet se ka nisur të godas sërish gardhin rrethues.
Reagon PD
Partia Demokratike akuzon kryeministrin Rama dhe kryebashkiakun Veliaj se kanë urdhëruar policinë të dhunojë qytetarët që protestojnë kundër ndërtimit tek parku i liqenit.
Në një deklaratë për mediat, PD thekson se mbështet protestën e shoqërisë civile dhe qytetarëve të Tiranës dhe kërkon lirimin e personave që janë shoqëruar në polici.
“Partia Demokratike dënon ashpër dhunën e ushtruar sot ndaj të rinjve, ndaj të moshuarve, ndaj burrave e grave të Tiranës, që kanë dalë në mbrojtje të pasurisë së tyre, kanë dalë në mbrojtje të Parkut të Liqenit. Kjo dhunë e shëmtuar burracakësh është urdhëruar nga Edi Rama dhe Erion Veliaj, për të mbrojtur aferën korruptive të ndërtimit të paligjshëm. Partia Demokratike mbështet qëndresën e shoqërisë civile dhe qytetarëve të Tiranës. Ne jemi në krahun e tyre në këtë lëvizje vendimtare për të ardhmen e qytetit dhe të demokracisë në vend.
Partia Demokratike kërkon hetim të menjëhershëm nga prokuroria dhe vënie para ligjit të policëve që kanë ushtruar sot dhunë si dhe eprorëve të tyre. Kërkojmë lirimin e menjëhershëm të qytetarëve që janë shoqëruar në polici.
Protesta e qytetarëve të bashkuar në mbrojtje të pasurisë publike jo vetëm nuk ndalet, por do të përshkallëzohet deri në ndaljen e oligarkut lokal të Edi Ramës, mashtruesit të korruptuar Erion Veliaj. Ju bëjmë thirrje qytetarëve të Tiranës të bashkohen nesër në orën 10 para Bashkisë dhe më pas në marshimin e protestës drejt Parkut të Liqenit.”- thuhet në deklaratën e PD-së.
Para Bashkisë
Ndërkaq, protestuesit e kanë shpërngulur protestën e tyre para Bashkisë, duke i bërë thirrje policisë të lirojë të arrestuarit.
