Përmirësimi i cilësisë së shërbimit ndaj qytetarëve dhe njohjes të të drejtave për lidhjen e pensioneve brenda afatit ligjor, veçanërisht përsa i përket pensioneve të invaliditetit, ishte në fokus të analizës vjetore për vitin 2016 në Drejtorinë Rajonale të Sigurimeve Shoqërore Tiranë.
Këto çështje, si dhe diskutimet për përmirësimin e mëtejshëm të punës, ishin në qendër të analizës vjetore të Drejtorisë Rajonale të Sigurimeve Shoqërore Tiranë, ku morën pjesë edhe Ali Emini dhe Hasan Hoxha, zv/drejtorë të përgjithshëm të ISSH-së.
“Falë punës së mirë që kemi bërë gjatë vitit të kaluar, është shkurtuar koha mesatare e lidhjes së pensionit nga 45 ditë që e parashikon ligji, në 34 ditë. Ndërkohë, për të qenë sa më pranë qytetarëve për t’iu ofruar shërbimin sa më pranë qendrave të tyre të banimit, gjatë vitit 2016 hapëm dy agjenci të reja të sigurimeve shoqërore në zonën e Kinostudios dhe Kombinatit.Nuk mund të lë pa përmendur edhe punën që është bërë jo vetëm në realizimin e të ardhurave nga të vetëpunësuarit në bujqësi, por edhe në luftën kundër informalitetit dhe mirëmenaxhimin e fondeve të sigurimeve shoqërore”,është shprehur drejtori i DRSSH Tiranë, Arsim Rama. /b.d
