Plot 25 të vdekur, shumë të humbur, mes tyre shumë viktima shqiptare që jetonin në rrethinat e Shkupit dhe Tetovës, kanë humbur jetën nga përmbytjet tragjike në Maqedoni.
Situata mbetet ende e rrezikshme, ndërsa shumë dëshmitarë kanë ndarë tronditjen e asaj që kanë parë me mediat.
Reshjet e shiut kanë shkarkuar vërshimit e liqenit të Smilkovcit në autostradë, duke marrë disa jetë njerëzish, mes të cilëve edhe një fëmijë. Vladimit Angellovski, shofer i një kamioni, ka rrëfyer momentin e tmerrshëm kur uji i furishëm i ka rrëmbyer nga duart një fëmijë.
Ai tha për agjencinë AA se po përpiqej ta mbante fëmijën që ta shpëtonte, por uji e kishte marrë atë përpara bashkë me prindërit e tij.
“Pas meje ishte një makinë e vogël. Brenda ndodheshin një burrë, një grua dhe një fëmijë. Ata më kërkuan ndihmë. Burri nxori fëmijën nga dritarja që të ma jepte. Në momentin që doja të kapja fëmijën, uji i mori ata të tre përpara.
Më rrotulloi edhe mua dhe për një orë e gjysme mbeta i bllokuar në kamion”, është shprehur për mediat lokale Angellovski.
Ai ka shtuar se në të gjitha anët e rrugës thirrej për ndihmë. Banorët që jetojnë rreth liqenit janë afruar të gjithë që të ndihmojnë dhe policia me ndihmën e shpejtë kanë mbërritur me vonese për shkak të bllokimit të rëndë të rrugëve. Ndërkohë ka pasur shumë banorë që kanë komentuar tmerrin që kanë parë.
Banorët e lagjes “Hasanbeg” janë shprehur se diçka e tillë nuk kishte ndodhur kurrë dhe e kanë krahasuar situatën me një cunami. “Deri në këto momente janë dy pleq shqiptarë, njëri në Kamenik, dhe një plakë, është humbur një burrë shqiptar me tri vajzat e veta dhe të shoqen, trupi i një burri tjetër shqiptar ka ardhur bashkë me ujin që nga autobani”, është shprehur ai, duke shtuar se viktima vinte nga zona e rrugës “Xhon Kenedi”.
Banori nga lagjja “Hasanbeg” ka deklaruar për “Tetovasot” se kufoma e burrit shqiptar që mbërriti me ujin kishte mbërritur në oborrin e shtëpisë së tij. Ai kishte në xhep letërnjoftimin e një gruaje shqiptare, që e ka lënë banorin të hamendësojë që edhe vetë viktima ishte shqiptar.
Jozyrtarisht thuhet se janë rreth 30 persona të vdekur. Banorët thanë se me vite të tëra kanë kërkuar rregullimin e kanalizimit për të shmangur situata të tilla, por se fatkeqësisht nga autoritetet kompetente nuk është ndërmarr asgjë në këtë drejtim. Sipas tyre, problemi qëndron tek unaza dhe jo te liqeni.
Uji është mbledhur aty dhe ka përmbysur autobanin. Ndërkohë, e gjithë lagjja e Rashtakut është përmbysur nga reshjet. Ishte pikërisht kjo zonë nga ku nisën përmbytjet dhe vërshuan në Stajkovcë dhe Hasabeg, ku morën shumë viktima.
Banorët e kësaj lagjeje thanë për “Alsat M” në Maqedoni se ishin përpjekur të qëndronin në katet më të larta të shtëpive të tyre, ose mbi muret rrethuese për të mbetur gjallë nga vrulli i ujit. Në këtë lagje nuk kishin mbërritur autoritetet komunale me gjithë telefonatat e vazhdueshme të banorëve. Shtëpitë ishin të mbuluara nga uji dhe balta.
