Një skemë e mirëfilltë korrupsioni dhe bashkëpunim me bandat kriminale është zbuluar nga Policia e Shtetit dhe Agjencisë së Mbikqyrjes Policore në Sarandë. Protagonistë në këtë skemë kriminale ishte pikërisht shefi i Komisariatit në Sarandë Gëzim Bashllari i cili është arrestuar nga blutë. Në pranga kanë rënë gjithashtu dhe tre vartësit e tij Andi Duro, Ajdin Ismailaj dhe Robert Çullaj. Të katër zyrtarët e policisë akuzohen për tre vepra penale, shpërdorim detyre, kryerja e veprimeve arbitrare dhe mosmarrja e masave për të ndërprerë gjendjen e paligjshme kryer në bashkëpunim.
Arrestimi i tyre vjen pas një hetimi nga Drejtoria e Përgjithshme e Policisë së Shtetit dhe AMP ku u zbulua ndërtimi pa leje në një hapësirë plazhi në lagjen nr.1 në Sarandë. Për rastin gjithashtu u arrestuan 8 persona të cilët punonin në objekt si dhe një grua e cila që posedonte hapësirën e plazhit, për llogari të së cilës dyshohet se kryheshin punimet pa leje.
Nga hetimet dyshohet se shefi i Komisariatit dhe varësit e tij kanë lejuar ndërtimin pa leje kundrejt shumave të parave dhe nuk kanë marrë masa për parandalimin e paligjshmërisë. Burime nga policia bëjnë me dije se prona ka qenë në emër të Isuf Jaçaj, i cili u vra me tritol në makinën e tij në tetor të 2025. Ka dyshime se një grup kriminal me bazë në Kamëz, të ketë kryer shpërthimin me tritol, por gjithashtu të jenë autorë edhe të ngjarjeve të tjera në qytetin e Sarandës.
Së fundmi në pronën e marrë me dhunë nga ky grup, po ndërtohej një lokal veror për sezonin turistik. Për lejimin e kësaj prone dyshohet se është marrë ryshfet nga shefi i komisariatit të policisë Sarandë, dhe tre vartësit e tij të cilët u ndaluan nga Agjencia e Mbikëqyrjes Policore. Madje ka dyshime se Gazim Bashllari kishte informacione dhe për ngjarjet kriminale të tritolit në Sarandë, por nuk i ka zbardhur pasi kishte lidhje me grupet kriminale në fjalë.
Skandali u zbulua nga vetë drjetori i Përgjithshëm i Policisë së Shtetit Skender Hita i cili urdhëroi menjëherë hetimet ku më pas u zbulua se vetë policia e Sarandës ishte e përfshirë kokë e këmbë në këtë veprimtari. Më pas operacioni u drejtua nga Policia e Shtetit dhe AMP. Madje Hita pezulloi menjëherë nga detyra kupolën e policisë në Sarandë. I pezulluar nga detyra është dhe shefi i seksionit për hetimin e krimeve në volum në policinë e Sarandës, Blerim Tafçiu, pasi nuk është paraqitur për tu marrë në pyetje gjatë veprimeve hetimore të kryera nga Agjencia e Mbikëqyrjes Policore. Ndërkohë vijojnë hetimet për zbërthimin e plotë të personave të tjerë të dyshuar si të përfshirë në këtë veprimtari kriminale.
