Thuajse një fshat i tërë po zhduket nga erozioni pas reshjeve të mëdha, duke detyruar një pjesë të banarëve që të largohen prej aty.
Bëhet fjalë për Shkopetin, dikur i njohur nga mbipopullimi nga HEC-i, me mjaft të punësuar në këtë vepër hidroenergjetike; por që atyre tashmë po u rrëshket toka nën këmbë. Një pjesë nga mali është shkëputur, duke shkatërruar disa banesa, tokë bujqësore, pemtari dhe investimet e banorëve. Nga sa mësohet, 200 ha sipërfaqe tokë malore, si dhe tokë bujqësore po rrëshkasin nga erozioni.
Gjendja paraqitet mjaft e rëndë për banorët e fshatit. Ata shpresojnë tek institucionet për t’u ardhur në ndihmë që të strehohen diku. Këta të fundit sakaq janë frikësuar dhe ajo çfarë kanë vlerësuar disa specialist, të cilët duke parë praninë e madhe të ujrave nën sipërfaqen e tokës, e klasifikuar tërësisht të papërshtatshme jetesën e atyshme.
Valentin Gjoka, banor i fshatit, tregon për situatën e rëndë të disa familjeve. Ata janë larguar duke lënë një pasuri mjaft të madhe, por fatmirësisht pa shkaktuar dëme në njerëz nga shkarja e madhe e tokës.
“Prej vitesh banorët e fshatit po largohen nga kushtet e papërshtashme dhe gjendjes ekonomike, papunësisë, mungesës së investimeve, ndërsa një pjesë tjetër tashmë po braktisin fshatin nga erozioni masiv. Një fshat dikur gumëzhinte nga punëtorët e HEC-it me mjaft të ardhura pë familjet, ndërsa çdo ditë dhe më shumë banorët largohen nga kushtet e vështira të krijuara tashmë nga shkarja e tokës duke lënë nga pas mjaft investime ndër vite”, thotë Gjoka.
Sipas tij, edhe nxënësit e shkollës janë pakësuar ndjeshëm, ndërsa një pjesë e fshatit është e ndarë nga shembja e urës e banorët lëvizin nëpërmjet lundrës primitive që është një rrezik permanent për jetën e tyre.
Dhe kjo ndodh afro treçerek ore larg Tiranës, në një zonë aspak të thellë malore. Përkundrazi, në një zonë me bukuri të jashtëzakonshm, ku do ia kishte ënda çdokujt të jetonte për shkak të nurit zviceran të natyrës reth e qark. /tesheshi.com/
