Shkolla në Kodër-Kamëz, Rama mbështet Veliajn: Nuk tërhiqemi!

Kryeministri Edi Rama ka dalë në mbështetje të Bashkisë së Tiranës për vijimin e ndërtimit të shkollës në Kodër-Kamzë, kundrejt përplasjeve të forta me universitetin. Nga Qyteti Studenti, ku kreu i qeverisë dhe ai i Bashkisë së Tiranës inspektuan rikonstruksionin e dy godinave të reja, bënë me dije se nuk kanë ndërmend të tërhiqen nga projekti. Ambientet e degraduara për shkak të lidhjeve politike, sipas Ramës, do të kthehen në shërbim të banorëve.

“Kjo moda që është në krijim e sipër, por që ne nuk do ta lëmë të krijohet dhe të marrë formën e një instrumenti legjitim, që unë nuk jam dakord dhe unë hidhem përpjetë, dhe unë i zë rrugën, dhe unë i bllokoj, dhe unë përplasem, dhe unë kështu e unë ashtu, është barbari. Kjo nuk është qytetari. Ky vend ka një qeveri dhe një shumicë qeverisëse, që ka gatishmërinë të dëgjojë, ka dhe predispozitën të reflektojë, ka edhe kurajën të thotë “ok, këtu në këtë pikë keni të drejtë ju, s’kemi të drejtë ne dhe hajdeni ta ndryshojmë” dhe s’ka nevojë për karshillëqe dhe për kërcënime”, deklaroi Rama, duke nënvizuar se gjatë qeverisjes së tij ka bërë për UBT-në më shumë se ç’është bërë në tri dekada.

Për kryebashkiakun Veliaj, kundërshtimi edhe për këtë projekt të bashkisë është kthyer tashmë në “modë”, ndërsa thotë se protestuesit janë ata që dikur kishin plan për pallate, gjë që në planet e qeverisë dhe bashkisë, sipas tij, nuk ekziston.

“Kur u ndërtua motel me orë brenda në kampus nuk protestoi njeri. Është kthyer në modë, që sa herë nis një punë Bashkia e Tiranës, o burra, ta bllokojmë. E njëjta gjë tek Astiri, e njëjta gjë te Bregu i Lumit. Plani i Bashkisë së Tiranës dhe i Kryeministrit, me planin e ri urbanistik e ka të gjithën për arsim. Patjetër që do përdoret, por do përdoret për arsim. Të shohësh autorët e planit të vjetër që sot vënë kujën, ku vetë kanë firmosur që aty të kishte pallate, pse ne e bëmë për arsimin dhe pse ata fëmijë aty do kenë një shkollë, më duket nonsens”.

Nga takimi me studentët, kryetari i bashkisë dha lajmin e mirë për ta, kartën e studentëve, që do të implementohet në muajin tjetër, ndërsa rikonstruktimi i konvikteve nga ana e bashkisë do të prekë edhe ata të Universitetit Bujqësor. Ndërsa një projekt më madhor, si kampusi i Universitetit të Tiranës, që premtohet në çdo fushatë elektorale vendore a universitare, u zotua të realizohej nga Veliaj në mandatin e tij të dytë.

/a.meta