Shkolla e re 9-vjeçare në Astir do të jetë gati për vitin e ri shkollor. Lajmi është dhënë gjatë inspektimit të punimeve nga kryetarja e komanduar e Bashkisë së Tiranës, Anuela Ristani, e cila dha detajet e ecurisë së këtij investimi të shumëpritur për banorët e zonës.
“Jemi në shkollën e re, në Astir, shkollë 9-vjeçare e cila përveç se do të akomodojë 1000 nxënës, do të jetë një shtesë për herë të parë në të gjithë infrastrukturën publike të kësaj zone, një zonë me ngarkesë shumë të madhe, qoftë në dendësi banorësh, qoftë edhe në nevojat për investime në infrastrukturë. Është një shkollë e shumëkërkuar e cila ka ecur tej mase mirë dhe me gjithë përpjekjet e mundshme do të bëjmë të mundur që të jetë e gatshme për vitin e ri shkollor 2026-2027”, deklaroi Ristani.
Kryetarja e komanduar e Bashkisë së Tiranës njoftoi gjithashtu se krahas ambienteve të përcaktuara për zhvillimin e mësimit, në këtë godinë janë parashikuara hapësira të dedikuara edhe për parashkollorët.
“Përveç akomodimit të 1,000 nxënësve, do kemi edhe dy klasa parashkollore, të cilat do të furnizohen më pas me kopshtin nga ana tjetër e rrugës, i cili do të ndërtohet po ashtu nga fillimi. Jemi shumë të kënaqur të ofrojmë këto mundësi banorëve të kësaj zone, pasi prej vitesh është kërkuar të ketë një shërbim të arsimit publik, një zonë e re me shumë banorë, me shumë familje të reja dhe më në fund jemi në gjendje t’ua ofrojmë”, përfundoi fjalën e saj Ristani.
Realizimi i projektit të Bashkisë së Tiranës për ndërtimin e shkollës së re 9-vjeçare në rrugën “Muharrem Çaushi” parashikon një investim modern me sipërfaqe totale ndërtimi 6 mijë e 397 m².
Objekti, i zhvilluar në tre kate me arkitekturë bashkëkohore, përfshin 28 klasa mësimi, laboratorë, bibliotekë, palestër, sallë multifunksionale, ambiente për fëmijët me aftësi ndryshe, si dhe hapësira rekreative dhe sportive, përfshirë një tarracë të gjelbëruar.
Shkolla është projektuar për të ofruar kushte optimale mësimi dhe për të funksionuar si një qendër komunitare, me akses të plotë për personat me aftësi të kufizuar dhe infrastrukturë bashkëkohore në shërbim të nxënësve dhe stafit arsimor.
