Ministri i Drejtësisë, Ylli Manjani, ka propozuar një projekt-ligj për disa ndryshime për Shkollën e Magjistraturës për t’i ardhur në ndihmë gjyqësorit dhe studenteve që studiojnë jashtë vendit, si dhe atyre që janë pjesë e fondit të Shkollën e Magjistraturës.
Me propozim të ministrit të Drejtësisë, Ylli Manjani, Ministria e Drejtësisë ka përgatitur projekt-ligjin “Për disa shtesa dhe ndryshime në ligjin nr. 8136, datë 31.7.1996 “Për Shkollën e Magjistraturës”.
Nëpërmjet një deklarate për mediat nga Ministria e Drejtësisë bëhet e ditur se “Paralelisht, Ministria e Drejtësisë ka nisur konsultimet për këtë projekt me aktorët më të rëndësishëm të përfshirë në proces, si Shkolla e Masgjistraturës dhe Ministria e Arsimit dhe Sportit. Ky projekt-ligj vlerësohet si tejet i rëndësishëm, si për të ardhmen e gjyqësorit, ashtu dhe për të ardhmen e të rinjve shqiptarë të arsimuar jashtë vendit dhe të atyre që janë pjesë e fondit të Shkollën e Magjistraturës. Rëndësi edhe më të veçantë, kjo nismë merr në kuadër të procesit të Rivlerësim të punës së Gjyqtarëve dhe Prokurorëve aktualë”.
Në deklaratë theksohet se “Ministri i Drejtësisë vlerëson se Shqipëria duhet të ketë burime njerëzore të trajnuara të gatshme për të përballuar këtë proces. Qëllimi projekt-ligjit është të krijojë lehtësira për të reja dhe të rinj që kanë mbaruar studimet e larta jashtë vendit si dhe të gjithë ata studentë të ekselencës që duan të bëhen magistër. Projekti përcakton që të paktën në vitin e parë për këtë kategori, pranimi të bëhet me procedura të lehtësuara, por pa çeduar në cilësinë e përzgjedhjes”.
“Me propozim të ministrit Manjani, Ministria e Drejtësisë kërkon që brezi i parë i pranuar në këtë shkollë nga kategoria e atyre që kanë studiuar jashtë vendit, t`u ofrohet një program formimi profesional i përshpejtuar i kombinuar me praktikë. Rëndësi të veçantë merr dhe shtimi i kuotave nga Shkolla e Magjistraturës për pranimin e studentëve, pa detyrimin e shtetit për të paguar shpenzimet e studimit. Përmirësimi dhe zgjerimi i modaliteteve të pranimit në Shkollën e Magjistraturës do të bëhet duke mbajtur parasysh rëndësinë që paraqet fondi i njohurive dhe përvojës që këta studentë kanë lidhur me traditat e sistemeve juridike duke respektuar dhe inkurajuar pavarësinë intelektuale të këtyre kandidatëve. Përzgjedhja duhet të bazohet mbi meritat duke marrë parasysh kualifikimet dhe aftësinë”, thuhet në njoftimin e Ministrisë së Drejtësisë. /ATSH/
