Një 35-vjeçar nga Elbasani është arrestuar nga policia pasi mbrëmjen e djeshme shkoi në spital për të marrë mjekim, pasi dyshohet se ishte plagosur me armë zjarri. Ai u prangos nga policia për shkak se refuzoi të tregonte rrethanat e vërteta të ngjarjes.
Edhe dy miqtë e tij u arrestuan për moskallëzim krimi. Kanë qenë ata që e dërguan në spital shtetasin Fatmir Murati.
Ky i fundit, pasi mori mjekimin, doli nga spitali. Gjatë marrjes në pyetje, i riu tha se është dëmtuar pasi ishte rrëzuar nga motori.
Policia nuk arriti të konfirmonte versionin e 35-vjeçarit, teksa nga kontrollet e ushtruara në vendin e aksidentit të pretenduar, nuk u gjet asnjë provë.
Njoftimi i policisë:
Shkoi për mjekim në spital, i dëmtuar në këmbë, dyshohet me armë zjarri, dhe nuk tregoi rrethanat e ngjarjes, arrestohet në flagrancë nga Policia.
Në pranga edhe 2 shtetas të tjerë (shokët e tij), për moskallëzim krimi.
Specialistët për Hetimin e Krimeve të Komisariatit të Policisë Elbasan arrestuan në flagrancë shtetasit:
F. M., 35 vjeç, Sh. H., 33 vjeç dhe M. G., 30 vjeç, të tre banues në lagjen “5 Maji”, Elbasan.
Më datë 30.12.2022, rreth orës 21:30, ka shkuar për mjekim në spitalin rajonal të Elbasanit, shtetasi F. M., me një plagë në këmbë, e dyshuar e shkaktuar nga një armë zjarri. Pasi ka marrë mjekim, ky shtetas ka dalë nga spitali.
Gjatë marrjes në pyetje nga grupi hetimor, shtetasi F. M. ka deklaruar se ishte dëmtuar me një hekur, pasi ishte rrëzuar nga motori, në vendin e quajtur “Harqet”.
Shërbimet e Policisë kanë shoqëruar edhe shtetasit Sh. H. dhe M. G., shokë të shtetasit F. M., të cilët gjatë marrjes në pyetje nuk kanë treguar rrethanat e vërteta të ngjarjes.
Grupi hetimor nuk ka gjetur asnjë send të kundraligjshëm, gjatë kontrollit në vendin e ngjarjes të pretenduar nga 35-vjeçari.
Nën drejtimin e Prokurorisë pranë Gjykatës së Rrethit Gjyqësor Elbasan vijon puna për zbardhjen e rrethanave të ngjarjes, identifikimin dhe kapjen e personave të përfshirë në këtë ngjarje.
Materialet i kaluan Prokurorisë pranë Gjykatës së Shkallës së Parë Elbasan, për veprat penale “Moskallëzimi krimit” dhe “Veprime që pengojnë zbulimin e të vërtetës”./m.j
