Një vrasje me thikë u shënua pasditen e kësaj të hëne në Shkodër, ku 55-vjeçari Prendush Fushaj u qëllua për vdekje.
Nga hetimet paraprake të policisë dyshohet se autori i krimit është Fredi Pllumi 30 vjeç, i cili është identifikuar dhe shpallur në kërkim nga policia.
Mësohet se viktima kishte një dyqan biçikletash dhe gjatë së dielës kishte denoncuar Pllumin në polici, duke e akuzuar se i kishte vjedhur një shumë parash.
Ai kishte përmendur në polici emrin e Pllumit si autor të dyshuar, për vjedhjen e ndodhur në banesën e tij shkruan noa.
Por ky i fundit fqinj me viktimën, duket se nuk e ka gëlltitur dot denoncimin e bërë në polici, duke i dalë përpara dhe duke e qëlluar disa herë me thikë.
Ngjarja ndodhi rreth orës 19.15 të së hënës, ku në spitalin e Shkodrës, Fushaj u dërgua i goditur me thikë , i cili ndërroi jetë pak minuta më vonë.
Ngjarja ndodhi në lagjen “Mark Lula”, ndërkohë që policia vijon hetimet për zbardhjen e rrethanave të krimit.
