Ka shkuar në 8 numri i të prekurve nga koronavirusi në rrethin e Shkodrës. Numri më i madh i të prekurve duket të jetë në Vaun e Dejes, ku edhe është shënuar rasti më i ri ditën e sotme.
Mësohet se i prekuri më i ri është nipi i një familjeje në Vaun e Dejes, në të cilën më parë ishin infektuar edhe xhaxhai i tij, gjyshja, nusja e xhaxhait si edhe një vajzë.
Kur xhaxhai ishte ndjerë keq, nipi i kishte bërë frymëmarrje artificiale atij. Xhaxhai rezultoi me koronavirus, ndërsa rasti më i ri sot është pikërisht nipi i cili duket të jetë infektuar prej tij.
Pak ditë më parë, në redaksinë e abcnews erdhi një denoncim nga Vau i Dejes, ku një pjestare e familjes së prekur pretendonte se të afërmve të tjerë nuk i ishte marrë tamponi edhe pse kishte të prekur brenda tyre.
Në total, Shqipëria numëron 243 raste me koronavirus, 13 persona kanë ndërruar jetë, kurse 52 persona janë shëruar. Ministria njofton ndërkohë që 78 persona gjenden të shtruar në spital.
Rastet e reja me koronavirus gjatë 24 orëvë të fundit
12 raste Durrës
5 raste Tiranë
1 rast Shkodër
1 rast Korçë
1 rast Mirditë.//
g.kosovari
