Moskontrolli i cilësisë së produkteve ushqimore që tregtohen i ka rrezikuar jetën një vajze 13 vjeçe, banuese në fshatin Grudë e Re, në Shkodër. Angjelin Rrethaj, babai i vajzës rrëfen se si një pjesë metalike që ndodhej në përbërjen e sallamit të blerë, i ka ngecur në fyt vajzës së tij duke i rrezikuar jetën. “Po shkoja në punë kur dëgjoj 4 fëmijët që po bërtisnin në dhomë. Shkoj aty dhe gjej vajzën të mekur. Me vështirësi merrte frymë. Tregonte me shenja se diçka i kishte mbetur në fyt, ndërsa nuk fliste dot.

Duke e shtypur e futur gishtat në gojë arrita të nxjerr atë që i pengonte frymëmarrjen. Ishte një copë metali që ndodhej brenda sallamit që kishim fërguar dhe nuk ishte konstatuar pasi ishte në brendësi por kur e ka kaluar i ka mbetur në fyt. Shyqyr që u ndodha në shtëpi se ndryshe nuk di çfarë mund të ndodhte pasi vajza nuk fliste e nuk merrte frymë. Asgjë që blejmë nuk ka siguri. Shkova aty ku e kisha blerë por shitësi nuk e prodhon dhe nuk e di çfarë ka brenda. Sallami është prodhuar nga një firmë në Shkodër. Shkova dhe u thashë dhe më kërkuan falje, por falja nuk ka kuptim kur rrezikohen jetën e konsumatorëve. Kësaj i thonë me ble me lekë vdekjen.

Askush nuk i kontrollon. Bllokojnë tregun e bagëtive të gjalla. Por produktet që përpunohen e tregtohen nuk i kontrollon njeri. Asnjë ushqim nuk ka siguri”, thotë Angjelin Rrethaj teksa tregon copën e metalit të gjendur brenda sallamit. Ai i është drejtuar dhe autoritetit të ushqimit në Shkodër prej të cilëve thotë se është falënderuar, por shton se duhet përgjegjshmëri tek prodhuesit dhe ato që kontrollojnë sepse pasojat e dëmit nuk ndreqen dot pasi ai ka ndodhur.

ma.me