E pamundura po bëhet realitet. Një grup shkencëtarësh të Universitetit të Ohajos në Shtetet e Bashkuara të drejtuar nga profesori Rene Anand krijuan trurin e parë në epruvetë.
Qëllimi është për të njohur më mirë aktivitetin e trurit dhe për të mësuar reagimin e tij ndaj disa substancave të caktuara apo helmeve.
Kjo arritje, do të ndihmojë edhe në testimin e medikamenteve, të cilët mund të kurojnë Alzajmerin dhe Parkinsonin. Truri i përftuar në laborator ka të njejtin zhvillim sa ai i një fetusi prej 5 javësh.
Është i vogël sa goma fshirëse e një lapësi dhe nuk ka vetëdije. Ai u krijua nga qelizat e marra nga lëkura e personave të rritur, të transformuara në qeliza embrionale për t’i riprogramuar. Dhe ja ku u arrit, në modelin më të plotë të trurit njerëzor, të zhvilluar deri më tani. Për herë të parë, organi i prodhuar në laborator arrin të riprodhojë 99% të llojeve të ndryshme të qelizave dhe gjeneve që e përbëjnë, duke përfshirë një pjesë të palcës së kurrizit dhe retinës.
Për të kaluar në hapin e mëtejshëm të rritjes së organit është e nevojshme një rrjet enësh gjaku, që mund të arrihet pa krijimin e një zemre artificiale. Ekipi i shkëncëtarëve i Universitetit të Ohajos po ruan me shumë kujdes teknikën e përdorur. Mungesa e qartësisë i bën shkëncëtarët e tjerë të kenë dyshime, por nëse lajmi konfirmohet dhe miratohet nga komuniteti i shkencëtarëve, do të hapte një shteg krejtesisht të ri për studimin e funksionit të trurit dhe zhvillimin e medikamenteve të reja. /Tv Klan/
