Ndërtimi i Korridorit të Tetë shihet me interes për biznesin maqedonas. Kjo doli nga Forumi i tretë të biznesit dhe investimeve Shqipëri- Maqedoni, që u zhvillua të mërkurën në Tiranë. Ambasadori i Maqedonisë në Shqipëri, Stojan Karajanov tha se me rëndësi kyçe për të dy shtetet është lidhja infrastrukturore dhe me përfundimin e Korridorit të Tetë hapen mundësi të mëdha për lidhjen e porteve detare të Turqisë dhe të Bullgarisë me portet detare të Shqipërisë, që janë një mundësi e jashtëzakonshme edhe për biznesin maqedonas, transmeton atsh.
Maqedonia e Shqipëria si shtete fqinje të parë, ndajnë aspirata të njëjta në kuadër të proceseve të integrimit euroatlantik dhe zhvillimit e përparimit të bashkëpunimit rajonal, i cili, nënvizoi ai, duhet të intensifikohet në të gjitha sferat ekonomike.
Ministrja e Zhvillimit Ekonomik, Turizmit, Tregtisë dhe Sipërmarrjes, Milva Ekonomi u shpreh se bashkëpunimi me rajonin na mësoi se kemi potenciale të mëdha së bashku, por dhe për të çuar më tej kooperimin. Ajo informoi se shumë shpejt do të nënshkruhet marrëveshja e bashkëpunimit mes Agjencisë së Zhvillimit të Investimeve dhe përfaqësisë maqedonase në pjesën veriore.
“Kjo do të na sjellë lehtësi për investimet strategjike, pajisjen me leje dhe licenca”, u shpreh më tej ekonomi. Gjatë forumit, vuri në dukje Ekonomi, bizneset kanë mundësi që të shkëmbejnë informacione për zonat teknologjike dhe industriale.
“Dy vendet tona aspirojnë të kenë një hapje më të madhe të kapitalit, lëvizje më të lirë të shërbimeve, të shkëmbimit të eksperiencave sipërmarrëse. Këtë lloj bashkëpunimi vendet tona nuk e gjejnë vetëm në takimet e drejtpërdrejtë si ndodhi këto dy ditë, por edhe me tavolina të rrumbullakta apo forume rajonale”, deklaroi Ekonomi.
