Komisioni hetimor për privatizimin e OSSH-së ka prodhuar sërish debate mes Taulant Ballës dhe djalit të ish kryeministri Berisha, Shkëlzen Berisha, duke sjellë për herë të tretë dështimin e seancës së dëshmisë.
Balla fillimisht i është referuar dëshmisë së Nue Kalajt, duke thënë se policia ka kërkuar në shtëpinë e tij Kalajn, por ai nuk është gjendur, teksa e shoqja ka thënë se nuk ka dijeni për vendndodhjen e tij.
Pas kësaj në sallë është futur Shkëlzen Berisha i cili ka vijuar duke thënë se nuk mund të betohet para një kryetari komisioni të dënuar. Kreu i komisionit i ka fikur mikrofonin Berishës dhe prej aty ka nisur debati mes të dyve. Shkëlzen Berisha e ka cilësuar si palaçon e Ramës, ndërsa Taulant Balla është shprehur se ai është shembulli se përse duhet vettingu.
Pas largimit të Shkëlzen Berishës, Taulant Balla është shprehur se ai ka përfituar 200 mijë euro nga Ismail Mulleti, emri i të cilit doli dhe në “Panama Papers”.
Emri i Ismail Mulletit u përfol në skandalin e Panama Papers që hidhte dritë mbi paratë e shqiptarit. Mulleti ishte bashkëpronar i GFI Technologies me një izraelit të quajtur Assaf Halkin. Kjo kompani në Shqipëri ka fituar koncensionin e markimit të karburanteve në kohën e qeverisë Berisha.
Sipas Ballës, Shkëlzen Berisha dhe qeveria e të atit kishin lidhje me Ismail Mulletin.
“Seanca e sotme tregon sa i rëndësishëm është Vettingu, pasi ky dhe babai i tij janë mësuar të caktojnë gjyqtarët dhe të bëjnë si të duam. Ky komision nuk ka dyshime që Nue Kalaj ka pasur lidhje, sepse kemi edhe prova filmike. Një provë shumë e rëndësishme që e lidh këtë person me pagesat e dyshimta.
Banka e nivelit të dytë e cila na ka sjellë transaksionin të ardhura në llogaritë e Shkëlzen Berishës, që nuk ka paguar asnjë taksë. Vetëm në një ditë ky dëshmitar në datën 22 qershor 2009 ky person ka marrë 200 mijë euro nga Ismail Mulleti, kemi transaksionin, prandaj nuk përgjigjet dhe fshihet ky person, pas një palo vendimi të një gjyqtari të emëruar nga babai, por që nuk ka lidhje me këtë cështje.-tha Balla.
*Faksimile e transfertës 200 mijë euro nga Ismail Mulleti te Shkëlzen Berisha
DEBATET
Balla: Formulën e betimit e lexon Ulsi Manja, sekretar i komisionit hetimor.
Shkëlzen Berisha: I dënuar kryetar, i nderuar sekretar, unë kam paraqitur një kërkesë me shkrim për përjashtimin e kryetarit të këtij komisioni. Jama njoftuar nga media edhe pse nuk më është dhënë asnjë shkresë me shkrim. Ky vendim që keni marrë është marrë në shkelje të hapur me kodin e procedurës penale
Balla i fik mikrofonin: E drejtoj unë seancën këtu
Shkëlzen Berisha: Ti je një shpifës i dënuar nga gjykata
Balla: Ti ke ardhur këtu për të bërë teatër.
Shkëlzen Berisha: O shpifës
Balla i fik sërish mikrofonin
Balla: Ka ikur koha kur ti jepeje fjalën
Shkëlzen Berisha: Palaçoi i Ramës
Balla: Nëse nuk bën betimin del përjashta
Balla: Zotëria po fyen institucionin, dil përjashta, garda ta shoqërojë!
