Zbardhen shkeljet ligjore gjatë procesit gjyqësor për Sokol Mjacaj, në lidhje me vrasjen e një 13vjeçari në vitin 2010, për të cilin u dënua me vetëm 5 vite burg.
Sipas asaj që raporton televizioni News24, Mjacaj i cili akuzohet së fundmi për vrasjen e çiftit çek në Prekal të Dukagjinit, në ngjarjen e vitit 2010 sipas palës mbrojtëse të 2 personave të tjerë të përfshirë në këtë ngjarje, vëllezërve Kodra, janë bërë 15 shkelje gjatë hetimit dhe gjykimit.
Pala mbrojtëse deklaron se në lidhje me atë ngjarje procesi gjyqësor ka qënë i parregullt.
“Një proces i rregullt,, do kishte parandaluar vrasjen e turistëve çekë”. Shprehet avokati i vëllezërve Kodra, Ndue Gjoni duke shtuar se nuk është hetuar mënyra e mbytjes së 13-vjeçarit, si dhe nuk janë hetuar komunikimet telefonike të Mjacajt.
Avokati pretendon se janë shmangur tabulatet si dhe nuk janë pyetur 10 perona. Ai shton se: “Celularit që Mjacaj i mori viktimës, nuk iu morën gjurmët. Vëllezërit Kodra u dhunuan nga policia, u tha se u përleshën me viktimën”.
Avokati pretendon ndër të tjera se janë ndryshuar 7 herë deklarimet e Sokol Mjacajt si dhe janë zhdukur tabelat fotografike të tij në polici.
“Organi i akuzës veproi me standard të dyfishtë. Gjykata ndaloi pyetjen e disa dëshmitarëve. Ndryshimi i kualifikimit juridik nuk u bë sipas ligjit”, thotë Gjoni për News24.
Ai shtoi se për të gjitha këto, pala mbrojtëse ka bërë kërkesë ankimore në KLD, tek ministri i Drejtësisë, Nasip Naço si edhe ministri i Brendshëm Saimir Tahiri në vitin 2013. Në lidhje me këtë ngjarje, Besnik Kodra është dënuar me burg përjetë, ndërsa Edmond Kodra me 11 vite. Për këtë ngjarje, Sokol Mjacaj u dënua me 5 vite burg. Të tre këta persona kanë vrarë me gurë lumi 13 vjeçarin në shtator të 2010, në fshatin Pjollë, komuna Shalë, pasi s’u jepte varësen e floririt, të cilën ia kishin blerë prindërit e tij. Tre të rinjtë i kishin shitur lëndë narkotike viktimës, për të cilën nuk kishin marrë paratë.
