Nëse zotëron një automjet, gjasat janë që vitin e kaluar të kesh marrë një numër më të madh gjobash se ndonjëherë. Policia rrugore dhe ajo bashkiake u treguan më dorëlëshuar në vënien e masave administrative për automjetet gjatë vitit 2022, ku shifra arrin në 1 milion e 42 mijë.
Shifra është mbresëlënëse, duke llogaritur faktin se për disa muaj, të dy autoritetet patën probleme me sistemin për shkak të sulmeve kibernetike nga ana e hacker-ave iranianë.
Policia Bashkiake e Tiranës ndërkohë raporton një shifër totale prej 293 mijë gjobash rrugore vitin e kaluar, në rënie me 11% krahasuar me 2021-in. Por nëse nga llogaria heqim muajt qershor, shtator dhe tetor, me probleme në sistem, atëherë rezulton se bashkiakët janë treguar më agresivë, duke vendosur 18% më shumë gjoba. Gjobat brenda Tiranës lidhen thuajse tërësisht me parkimin e gabuar.
Me një mesatare prej 1,500 lekësh për çdo shkelje, shkeljet kapin një vlerë totale prej së paku 1.56 miliardë lekësh, apo 13.5 milionë eurosh.
/s.f
