770 qytetarë janë gjobitur gjatë 24 orëve të fundit në të gjithë vendin pasi janë identifikuar në kundërshtim me rregullat anti Covid.
746 qytetarë janë gjobitur me 3000 lekë pasi janë konstatuar pa maskë mbrojtëse.
10 lokale, bare dhe restorante janë gjobitur me 1.000.000 lekë pasi janë evidentuar duke ushtruar aktivitetin në shkelje me kufizimet për shkak të Covid 19.
14 qytetarë që lëviznin pas orës 22:00 pa dhënë arsye të domosdoshme, janë ndëshkuar me masën administrative 10.000 lekë secili.
Policia e Shtetit bënë thirrje për respektimin e rregullave. Maskat mbrojtëse vazhdojnë të jenë të detyrueshme si në ambientet e hapura dhe ato të mbyllura. Ndërsa gjatë orarit 22:00-06:00 ndalohet lëvizja e këmbësorëve dhe automjeteve.
Njoftimi i policisë:
Gjatë 48 orëve të fundit, shërbimet e Policisë kanë ushtruar kontrolle të vazhdueshme në të gjithë vendin, për monitorimin e zbatimit të masave anti covid.
770 shtetas janë ndëshkuar me masë administrative, pasi nuk i kanë zbatuar këto masa.
Strukturat e Policisë, krahas përmbushjes së detyrave funksionale për parandalimin, evidentimin dhe goditjen e paligjshmërisë, kanë vijuar kontrollet në terren, në të gjithë vendin, për të monitoruar zbatimin e masës për parandalimin e përhapjes së COVID-19, mbajtjen e detyrueshme të maskës mbrojtëse, e cila është detyrim për të gjithë qytetarët, që në momentin që dalin nga shtëpia.
Si rezultat i këtyre kontrolleve, gjatë 48 orëve të fundit, në të gjithë vendin, Patrullat e Përgjithshme dhe ato të Policisë Rrugore kanë evidentuar dhe ndëshkuar me masën administrative 3.000 lekë secili, 746 qytetarë që janë konstatuar duke lëvizur pa maskat mbrojtëse.
Gjatë kontrolleve janë shoqëruar në ambientet e Policisë në të gjithë vendin, 9 shtetas që nuk kanë pranuar t’i tregojnë punonjësve të Policisë dokumentin e identifikimit, të cilët pasi kanë paraqitur dokumentin e identifikimit, janë ndëshkuar me masën administrative 3.000 lekë dhe më pas janë lënë të lirë.
Gjatë kontrolleve të ushtruara në subjekte të ndryshme, shërbimet e Policisë kanë evidentuar 10 subjekte (bare, lokale, restorante) që ushtronin aktivitetin në kundërshtim me protokollet e sigurisë. Për administratorin e secilit subjekt është vendosur masa administrative 1.000.000 lekë.
Gjithashtu, gjatë kontrolleve janë konstatuar 14 qytetarë që lëviznin në rrugë gjatë orarit të ndalimit të lëvizjes, pa arsye të domosdoshme, të cilët janë ndëshkuar me masën administrative 10.000 lekë secili.
Policia e Shtetit, krahas punës për parandalimin, evidentimin dhe goditjen e paligjshmërisë, sigurimin e rendit dhe qetësisë publike, do të vijojnë punën për monitorimin e zbatimit të masave anti covid në të gjithë vendin. Në këtë kuadër, Policia apelon për të gjithë qytetarët që të zbatojnë me rigorozitet masat anti covid./a.p
