Policia e Shkodrës ka njoftuar këtë të premte, më 24 tetor, se ka finalizuar operacionin e koduar “Hunters”, që ka çuar në arrestimin e pesë shtetasve që u kapën në flagrancë në fshatin Rragam, duke ushtruar gjueti të paligjshme.
“Gjatë kontrolleve, në fshatin Rragam, shërbimet e Policisë kanë konstatuar 5 shtetas që kryenin gjueti të paligjshme. Gjatë kontrollit në automjetin me të cilin qarkullonin këta shtetas, u gjetën: 1 armë zjarri pistoletë, 1 armë zjarri pushkë, 1 armë gjahu teke, 1 armë gjahu shotgan, municion luftarak, 1 dron dhe 1 shpend i vrarë, të cilat u sekuestruan në cilësinë e provës materiale“, thuhet në njoftimin e bërë publik për mediat.
“Kontrollet e mëtejshme çuan edhe në gjetjen e një sasie lënde narkotike Cannabis Sativa në banesën e njërit prej të arrestuarve, shtetasit E. M., 36 vjeç. Në përfundim u arrestuan shtetasit: E. F., 30 vjeç, E. M., 36 vjeç, K. D., 36 vjeç, V. N., 29 vjeç dhe S. S., 23 vjeç, të gjithë banues në Shkodër“, tha policia.
Ndaj tyre rëndojnë akuzat për veprat penale “Mbajtja pa leje dhe prodhimi i armëve, armëve shpërthyese dhe i municionit”, “Prodhimi dhe mbajtja pa leje e amëve të gjuetisë dhe sportive”, “Dëmtimi i specieve të mbrojtura të florës dhe faunës së eger” dhe “Prodhimi dhe shitja e narkotikëve”.
