Autoritetet gjermane kryen një operacion ndërkombëtar që synonte rrjetet e dyshuara të mashtrimit dhe pastrimit të parave që shtriheshin në tre kontinente.
“Më shumë se 250 oficerë u vendosën në tetë lande gjermane”, tha Zyra Federale e Policisë Kriminale (BKA) dhe agjenci të tjera.
18 urdhërarreste u ekzekutuan të martën si në Gjermani ashtu edhe jashtë saj.
Të 44 të dyshuarit, 36 burra dhe tetë gra, të moshës midis 32 dhe 74 vjeç, akuzohen për përdorimin e informacionit të kartave të kreditit nga viktimat në 193 vende, për të krijuar mbi 19 milionë abonime të rreme nëpërmjet faqeve të internetit të rreme të drejtuara profesionalisht.
“Mashtrimi përfshinte mbi katër milionë mbajtës të kartave të kreditit dhe më shumë se 500 kompani të rreme”, thanë autoritetet.
Dëmi total nga viti 2016 deri në vitin 2021 vlerësohet në më shumë se 300 milionë euro (344 milionë dollarë).
Sipas prokurorëve, hetimi ndërkombëtar pesëvjeçar filloi në qytetin Montabaur të Gjermanisë Perëndimore, ku një i dyshuar drejtonte një kompani.
“Shumë nga faqet e falsifikuara të internetit përfshinin shërbime të dyshuara pornografike, takimesh dhe transmetimi, të cilat përdoreshin vetëm për të ngarkuar kartat e kreditit të viktimave”, tha BKA.
Tarifat mujore ishin qëllimisht të vogla, rreth 50 euro ose dollarë, dhe të listuara nën përshkrime të paqarta, duke i bërë ato të lehta për t’u anashkaluar ose për t’u identifikuar gabim nga mbajtësit e kartave. /ATSH
