Shkatërrohet banda shqiptare, shisnin telefona të vjedhur në Shqipëri
Banda shqiptare e grabitësve vepronte gjithmonë natën, kur pronarët ndodheshin në shtëpi. Policia italiane shkatërroi bandën shqiptare të specializuar për vjedhje dhe plaçkitje, ku 3 shtetas shqiptarë përfunduan në pranga.
“Il Centro” raporton se, të arrestuarit akuzohen për lidhje kriminale, vjedhje, grabitje dhe shitje të mallrave të vjedhura. Sipas policisë, grupi ka kryer dhjetëra vjedhje, ku disa nga sendet e gjetura në shtëpinë e tyre, zbuluan se ishin vjedhur në muajt e fundit në Palmoli.
“Policia ka konfirmuar se në banesën e tre shqiptarëve janë gjetur telefona, smart-phone, tableta, të vjedhura disa javë më parë”, tregoi kryetari i Palmoli-t, Masciulli Jozef.
Të tre personat e arrestuar ndodhen në burgun e Casoria-s. Policia ka sekuestruar edhe një makinë tip “Audi A3” i zi. Mallrat e vjedhura ishin gati për t’u shitur, ku dyshohet se destinacion ishte Shqipëria, për shkak të kërkesave të tregut shqiptar për telefona. Nuk përjashtohet edhe fakti se banda ishte duke bashkëpunuar me persona të tjerë.
