Report Tv sjell pamjet nga dëmet që janë shkaktuar në një nga shumë banesat që ndodhen pranë guroreve në fshatin Borizanë të Krujës, një nga të cilat u bë edhe ‘mollë sherri’.
Dhuna e fisit Rraja ndaj dy kushërinjve Maja në Borizanë, nisi si pasojë e shqetësimeve të tyre dhe të banorëve të tjerë të zonës për shpërthimet në guroret e pozicionuara shumë pranë banesave të tyre.
Siç duket në pamjet e siguruara dëmet dhe plasaritjet e banesave janë të konsiderueshme. Guroret me shtëpitë janë në distancë ajrore 100 apo 200 metra dhe shpërthimet sipas tyre dëgjohen shpesh.
Për Report Tv ato deklarojnë se kanë bërë protesta që më herët, por janë mbyllur shpejt. Ankesa sipas tyre kanë bërë nëpër institucione te ndryshme, kryesisht lokale, por asgjë nuk është bërë. Guroret e para janë ndërtuar rreth 15 vite më parë, por së fundmi janë shtuar të tjera që e ka bërë problemin më të dukshëm.
/f.stafa
