Komisioni i Pavarur i Kualifikimit, i përbërë nga Genta Tafa (Bungo), me relatore Suela Zhegun dhe anëtar Olsi Komicin, ka shkarkuar sot nga detyra, gjyqtaren e Gjykatës së Tiranës, Rezarta Balliu (Vigani).
KPK rrëzoi kërkesën e Balliut për riçeljen e hetimit për kriterin e profesionalizmit dhe të figurës.
KPK pretendon se se provat dhe shpjegimet e subjektit nuk kanë sjellë ndryshime në gjetjet për kriterin e pasurisë.
Gjyqtares Balliu iu kalua paraprakisht barra e provës për kontrata fiktive, mungesë burimesh dhe mosdeklarime në disa vite.
Por, Balliu kundërshtoi gjetjet e Komisionit, që e nxirrnin atë me bilance negative në një sërë transaksionesh.
Ajo kërkoi të mos vlerësohej për një pasuri që rezultonte 100 % në emër të bashkëshortit, problemet e të cilës ishin gjetur shkarkuese në rastin e tij.
Gjyqtarja këmbënguli që hetimi të rihapej edhe në dy kriteret e tjera.
Rezarta Balliu (Vigani) e ka nisur karrierën në sistemin e drejtësisë në vitin 2000 dhe e ushtroi funksionin prej dy dekadash në Gjykatën e Rrethit të Tiranës.
Njoftimi:
Komisioni i Pavarur i Kualifikimit njofton se pas shqyrtimit të dokumentacionit dhe zhvillimit të seancës dëgjimore në datën 1.7.2021, për subjektin e rivlerësimit, znj. Rezarta Balliu (Vigani) bazuar në ligjin nr. 84/2016, sot, në datën 7.7.2021, vendosi:
Shkarkimin nga detyra të subjektit të rivlerësimit, znj. Rezarta Balliu (Vigani), gjyqtare pranë Gjykatës së rrethit Gjyqësor Tiranë.
Vendimi i arsyetuar me shkrim nga trupi gjykues i kryesuar nga znj. Genta Tafa Bungo, znj. Suela Zhegu relatore dhe z. Olsi Komici anëtar, do t’i njoftohet subjektit të rivlerësimit, Komisionerit Publik dhe vëzhguesve ndërkombëtarë brenda 30 ditëve.
Ky vendim mund të ankimohet në Kolegjin e Posaçëm të Apelimit nga subjekti i rivlerësimit dhe/ose Komisioneri Publik 15 ditë nga data e njoftimit të vendimit të Komisionit. Ankimi depozitohet në Komisionin e Pavarur të Kualifikimit./m.j
