Policia e Shtetit ka arrestuar dy punonjës policie të burgut të Shënkollit në Lezhë pasi shisnin lëndë narkotike brenda qelisë. Në pranga kanë rënë Miklovan Kuliçi, 37 vjeç, banues në Tiranë, punonjës policie si dhe Ram Toskaj, 45 vjeç, banues në Babrru Tiranë, po ashtu punonjës policie.
Sipas policisë Miklovan Kuliçi u arrestua pasi, duke qënë me shërbim dhe nga monitorimi i veprimeve të tij nëpërmjet kamerave është konstatuar dhe fiksuar se diçka ka nxjerrë nga trupi duke e hedhur në krahun e djathtë të tij. U konstatua dhe u sekuestruan 3.55 gr kanabis sativa.
Ndërsa oficeri tjetër i policisë, u arrestua pasi, nga hetimet e para rezulton se ky shtetas të jetë i implikuar në veprën penale të prodhimit dhe shitjes narkotikeve për punonjësin e policisë së burgut Miklovan Kuliçi.
Po ashtu policia ka arrestuar edhe shtetasen Mrikë Lazri, 51 vjeç, banuese në Pukë. Arrestimi i saj u bë pasi, rreth orës 08.20, në IEVP Shënkoll Lezhë, tek dhoma e kontrollit të familjarëve për takim me bashkëshortin e saj, i është gjetur dhe sekuestruar 1.35 gr kanabis sativa. Në cilësinë e provës materiale ju sekuestrua dhe një telefon i markes Samsung dhe 4300 lek të rinj.
