Pllakat e sheshit përballë Teatrit Kombëtar të Kosovës kanë marrë pamje tjetër. Hapësira afër fontanës tashmë është shndërruar në një atraksion për kalimtarët. Duket sikur në dysheme është hapur një alamet grope dhe pllakat qëndrojnë në ajër. Si e tillë duket vetëm kur shikon nga pozita e duhur ose edhe kur e fotografon. Artisti holandez i artit të rrugës Mattheë May ka krijuar një iluzion optik duke përdorur metodën 3D të të vizatuarit në dysheme, shkruan Koha Ditore.
Një vepër e tillë është e para që zuri vend në kryeqytet dhe kjo falë Mayt, i cili erdhi në Prishtinë për t’u bërë pjesë e festivalit “Guerilla Art Festival”, i cili të enjten mbylli edicionin e parë. Ai është artisti i parë i cili nisi të merret me këtë 3D art në Holandë. Edhe pse merret me artin e rrugës ai nuk ngjason me një të tillë. Madje dukjen e konsideron si gjë shumë të rëndësishme. Për dy ditë me radhë, aq sa iu deshën për ta përfunduar veprën, ishte veshur me pantallona dhe këmishë. Duket goxha serioz.
“Njerëzit të marrin më seriozisht kur të shohin të veshur mirë”, thotë ai. I shkolluar për art, vepra 3D në rrugë do ta niste të realizonte krejt rastësisht dhe tani këtë e konsideron profesion. Deri më tani ka bashkëpunuar me kompani të njohura duke bërë art të rrugës në 3D për promovimin e tyre. “Disney”e “Samsung” janë vetëm dy prej tyre në listën e gjatë…
