Disa orë para protestës së planifikuar nga opozita të nisë në orën 20:00, godina e parlamentit dhe kryeministrisë janë rrethuar me gardh prej hekuri dhe tela me gjemba.
Në të gjitha protestat e mëparshme tubimi i protestuesve është pozicionuar para këtyre dy institucioneve ku nuk kanë munguar as hedhjet e tymueseve dhe të mjeteve piroteknike nga protestuesit. Në kundërpërgjime policia ka hedhur ujë dhe gaz lotsjellës.
Për ruajtjen e sigurisë dhe rendit janë angazhuar 1500 efektivë policie. Opozita ka kërkuar leje për protestë nga ora 20:00 deri në orën 23:59.
Ndërkohë simpatizantë të opozitës nga Berati dhe Lezha janë nisur drejt Tiranës, aty ku prej ditësh opozita ka pralajmëruar protestë. Ndërsa gati për nisje janë qytetarët nga Elbasani, Fieri etj.
Ndërsa ish-deputeti i PD-së, Tritan Shehu ka publikuar fotografitë e protestuesve të qarkut të Gjirokastrës që po vijnë në Tiranë për tubimin e 9 kombëtar të opozitës.
Sipas Shehut, janë 2500 protestues nga Gjirokastra, Përmeti, Libohova, Telepena, Dropulli dhe Këlcyra që do t’i bashkohen protestës. Sipas tij, të gjithë sot do jenë në Tiranë për t’i hapur rrugën ndryshimit.
”Qarku i Gjirokastrës, i vendosur të mbrojë vlerat e demokracisë e pluralizmit, përsëri në “rrugë” drejt Tiranës. Janë reth 2500 protestues nga Gjirokastra, Përmeti, Libohova, Tepelena, Dropulli e Këlcyrë, që do t’i bashkohen protestës së sotme”. Protesta pritet të nisë në orën 20:00, në bulevardin “Dëshmorët e Kombit”.
