Rritja ekonomike në Eurozonë ka ndikim pozitiv edhe në ekonominë shqiptare.
Ekonomia e Eurozonës është rritur me 0,4% në tremujorin e parë të vitit 2019, krahasuar me 0,2% në tremujorin e mëparshëm, bën të ditur Banka e Shqipërisë në raportin e politikës monetare për 3-mujorin e dytë 2019, publikuar së fundmi.
Sipas BSH-së, krahasuar me një vit më parë, rritja e PBB-së rezultoi 1,2%, duke ruajtur të njëjtin ritëm si në tremujorin paraardhës. Rritja ekonomike e Eurozonës është mbështetur tek kontributi pozitiv i shpenzimeve konsumatore, investimeve, dhe më pak te kërkesa e
huaj.
Treguesit paraprakë të zhvillimeve ekonomike, si edhe ata të besimit për tre muajt e fundit, sugjerojnë zbutje të ritmit të rritjes ekonomike në tremujorët në vijim. Një nga faktorët që po ndikon këtë ngadalësim është efekti i tensioneve tregtare në kërkesën e huaj, të cilat kanë ndikuar veçanërisht në sektorin e prodhimit të Gjermanisë. Gjithësesi trendi i rritjes vijon të jetë pozitiv, citon BSH-ja.
/a.r
