Më shumë se njëqind serbë janë tubuar sot në sheshin e ashtuquajtur “Braqa Iliq”(Vëllezërit Iliq) në pjesën veriore të Mitrovicës për ta pritur liderin radikal, Vojisllav Sheshelin.
Megjithëse ai nuk ka ardhur në Kosovë, lideri i Partisë Radikale Serbe iu është drejtuar tubuesve nga Beogradi.
Siç raporton gazetari i KP nga vendi i ngjarjes, Vojisllav Sheshel ka akuzuar Qeverinë e Serbisë dhe atë të Kosovës që nuk ia lejuan ardhjen në Kosovë.
“Për këtë fajtor është Qeveria tradhtare e Serbisë dhe separatistët shqiptarë, që nuk më lejuan të vij tek ju”, ka thënë Sheshel nga Beogradi.
Të tubuarit që po dëgjojnë fjalimin e Sheshelit përveç fotografive të tij kanë edhe fotografi të presidentit rus Vlladimir Putin.
Ndryshe për sot ishte paralajmëruar se Shesheli do të vijë në Kosovë por që një gjë e tillë ishte kundërshtuar nga zyrtarët e Qeverisë së Kosovës.
Madje ushtruesi i detyrës së ministrit të Punëve të Jashtme Petrit Selimi ka paralajmëruar se nëse Shesheli hyn në Kosovë ai do të arrestohet.
