Grupi parlamentar i Partisë Socialiste debatoi dje në lidhje me incidentin e ndodhur në një aeroport të Romës. Deputeti socialist, Taulant Balla pretendon se është goditur nga dhëndri i ish-kryeministrit Sali Berisha. Ndërkohë PS doli me një deklaratë zyrtare pas kësaj mbledhje.
Debati në grupin e PS
Gramoz Ruçi: Në aeroportin e Romës, e keni marrë vesh që ka ndodhur një incident mes nënkryetarit të grupit parlamentar, Taulantit, dhe dhëndrit e vajzës së Sali Berishës. Ne duhet të kemi një qëndrim publik për këtë incident, ndërkohë që Taulanti ndjek rrugën ligjore të kësaj ngjarje.
Artan Gaçi: Denoncimi publik, përveç rrugës ligjore, kërkon edhe fakte. Unë mendoj se duhet të bashkëpunohet me Policinë dhe Prokurorinë italiane që të na ndihmojnë me pamjet filmike, që ata kanë marrë në aeroportin e Romës, për t’i mbyllur gojën me fakte çdo kundërakuze që mund të vijë nga pala tjetër. Për këtë të kërkohet bashkëpunimi edhe i ambasadës sonë në Ronë për këtë ngjarje të turpshme.
Paulin Sterkaj: Incidenti ka ndodhur në Itali dhe nuk mendoj se Prokuroria shqiptare mund të hetojë një ngjarje të ndodhur në një vend tjetër, pavarësisht marrëveshjeve që mund të kemi me vendin fqinj. Këtë ngjarje mund ta hetojë vetëm Prokuroria italiane. Nisur nga kjo ngjarje, mund të them se thirrja e Berishës për t’u armatosur, qenka marrë nga familjarët e tij si thirrje për agresion ndaj deputetëve të mazhorancës. Reforma në Drejtësi duket se ua ka dobësuar nervat dhe se ata nuk po munden të ruajnë qetësinë, duke shpërthyer në incidente të tilla. Prandaj duhet ta miratojmë sa më shpejt këtë reformë.
BW/d.i.
