Një efektiv i Policisë së Shtetit dhe një shok i tij janë dhunuar në orët e para të mëngjesit nga disa shtetas dhe kanë përfunduar në spital.
Policia e Tiranës bën me dije se efektivi dhe personi tjetër i lënduar janë jashtë rrezikut për jetën, por nën kujdesin e mjekëve.
Sherri ka ndodhur në orët e para të mëngjesit të kësaj të shtune, në rrugën “Besim Alla”.
Njoftimi i policisë:
Më datë 02.09.2023 rreth orëve të para të mëngjesit, në rrugën “Besim Alla”, gjatë një konflikti për rrethana ende të paqarta, shtetasit B. B., dhe B. B., në bashkëpunim me disa shtetas të tjerë, dyshohet se kanë goditur shtetasit E. F., (punonjës policie), B. F., dhe automjetin e tyre.
Gjatë konfliktit, shtetasit E. F., i ka renë arma e shërbimit në tokë, e cila është gjetur më pas në vendngjarje. Si pasojë shtetasit E. F., dhe B. F., janë dëmtuar dhe ndodhen në spital, jashtë rrezikut për jetën.
Grupi hetimor po punon për sqarimin e rrethanave të konfliktit, dhe identifikimin e kapjen e personave të tjerë të përshfirë.
