Përmes një postimi në Twitter, kreu i diplomacisë greke shkruan:
“Vjen momenti, thotë poeti, të vendosësh me cilët do shkosh dhe kë do lësh (pas).
Por është mirë të mos harrojnë këtë varg: Deshën të më varrosnin thellë, harruan se unë jam fara”.
***
Ministri i jashtëm, Nikos Kotzias ka dhënë dorëheqjen nga posti të mërkurën pasdite (17 tetor)
Lajmi është konfirmuar nga zyra e shtypit e kryeministrit grek, me një njoftim të shkurtër për shtyp, ku thuhet: “Kryeministri Aleksis Tsipras pranoi dorëheqjen e ministrit të jashtëm, Nikos Kotzias. E falënderojmë nxehtësisht për kontributin e tij në qeveri dhe ndaj vendit 3,5 vitet e fundit.”
Postin e ministrit të Jashtëm e merr kryeministri, me qëllim që të kontribuojë me të gjitha forcat në përfundimin e suksesshëm të Marrëveshjes së prespës”.
Burimet e së përditshmes greke “Kathimerini” flasin për një përplasje mes Kotzias dhe ministrit të Mbrojtjes Panos Kamenos që ka ndodhur ditën e djeshme në mbledhjen e qeverisë.
Sipas kolegëve të ministrit të Jashtëm që kanë folur në kushte anonimati për “Kathimerini”,
“Kotzias ka qenë tmerrësisht i prekur nga sulmet e Panos Kamenos që e cilëson njeri të Soros, për akuzat e keqmenaxhimit të fondeve të Ministrisë së Jashtme dhe për sulme të tjera me karakter të ngjashëm”.
Në mbledhjen e djeshme të kabinetit qeveritar të Greqisë, ministri Kotzias i kërkoi Kryeministrit Tsipras që të mbikëqyrë fondet sekrete të Ministrisë së Mbrojtjes dhe të Ministrive të tjera. Sipas “Kathimerini”, Kotzias kërkoi nga Tsipras gjithashtu që të zbatojë të njëjtin ligj për të gjitha Ministritë që kanë në buxhetin e tyre një “fond sekret”, ligj që aktualisht aplikohet vetëm për Ministrinë e Jashtme.
Një nga Ministritë që kanë “fonde sekrete” është Departamenti i Mbrojtjes. Në propozimin që Kotzias bëri dje në mbledhjen e qeverisë, pati fyerje joetike mes ministrave Kamenos-Kotzias
Debati i djeshëm ndodhi në gjatë mbledhjes së këshillit ministror të Greqisë, pasi Kotzias deklaroi se Kamenos ‘fut hundët në politikën e jashtme’. Ndërkohë, ministri Kamenos ishte shprehur se marrëveshja e Prespës, duhej pas zgjedhjeve.
Gjatë mbledhjes, Kotzias kërkoi që Kammenos të japë shpjegime për deklaratat që kishte bërë gjatë vizitës në Uashington, mbi nënshkrimin e marrëveshjeve dypalëshe në Ballkan, gjë që do të linte për më vonë çështjen e emrit të Maqedonisë.
Për shkak të përplasjeve që ndodhën në mbledhjen e kabinetit qeveritar, ministri Kotzias dha sot përfundimisht dorëheqjen, dhe sipas mediave të Athinës, ai është i zhgënjyer nga Kryeministri Alexis Tsipras që nuk e mbrojti nga sulmet e ministrit Kamenos. Ky i fundit është kreu i partisë aleate në koalicionin qeverisës.
Kotzias ishte ministri që bëri negociata intensive me Shqipërinë për ndarjen e detit, heqjen e ligjit të luftës dhe disa çështjeve të tjera delikate mes dy vendeve
a.c
