Detaje të reja kanë dalë në lidhje me plagosjen që ndodhi në orët e para të ditës së sotme në Shkodër.
Si pasojë e një sherri në një lokal nate, mbeti i plagosur 21-vjeçari Edmir Nilaj.
Ndërsa mësohet se autori i ngjarjes është roja i lokalit, i identifikuar si Admir Dekovi, i cili është shpallur në kërkim nga policia.
Lidhur me këtë ngjarje, blutë e Shkodrës kanë shoqëruar 7 persona, të cilët mund të kenë dijen në lidhje me rrethanat e ngjarjes.
***
Një plagosje me armë zjarri ka ndodhur në orët e para të mëngjesit të sotëm në qytetin e Shkodrës. Ngjarja e rëndë ka ndodhur në një lokal në fshatin Beltojë, ku pas një konflikti të çastit mes disa të rinjve ka mbetur i plagosur rëndë me armë zjarri 21-vjeçari Edmir Nilaj.
Policia e Shkodrës njofton se plagosja ka ndodhur sot rreth orës 03:35. Sipas bluve, ka ardhur një telefonatë në sallën operative se në një lokal në afërsi të fshatit Beltojë, është një person i plagosur.
Menjëherë kanë shkuar shërbimet e Policisë ku kanë konstatuar se pas një konflikti të çastit me persona akoma të paidentifikuar, ka mbetur i plagosur me armë zjarri shtetasi E. N, 21 vjeç, banues Vekel, Malësi e Madhe.
Sakaq, janë ngritur pika të shumta kontrolli dhe po punohet për kapjen e autorëve. Paraprakisht dyshohet se autor i plagosjes mund të jetë truproja i lokalit, Admir Dekovi.
Përveç plagosjes me armë zjarri, i riu ka edhe shenja dhune në pjesën e pasme të kokës.
Dyshohet se autori i plagosjes mund të jetë një nga rojet e sigurisë, i cili po kërkohet nga policia.
Të paktën 7 persona janë shoqëruar në komisariat për t’u marrë në pyetje në cilësinë e dëshmitarëve, ndërsa pritet të merret në pyetje edhe pronari i lokalit.
Konflikti dyshohet të ketë ndodhur për motive banale.
Pritet të këqyren kamerat e sigurisë për të sqaruar më tej motivet e ngjarjes.
a.ç
