Një incident ka ndodhur këtë të premte, 9 janar, në tregun e rrobave të përdorura në zonën e “5 Majit”, ku një tregtar ka akuzuar një përgjegjës të tregut për nisjen e zjarrit të madh që përfshiu ambientet ditën e djeshme.
Debati ka eskaluar deri në përfshirjen e policisë, e cila është detyruar të ndërhyjë dhe të shoqërojë personat e përfshirë në konflikt.
Megjithatë, sjellim ndërmend se hetimet paraprake dyshojnë se shkak i zjarrit mund të ketë qenë një shkëndijë elektrike, e cila filloi nga njëri prej dyqaneve dhe u përhap tek bizneset e tjera.
Përveç dëmeve materiale, incidenti ka shkaktuar edhe dëme të mëdha mjedisore. Shtëllungat e tymit kanë ndotur ajrin në zonat përreth Tiranës, duke shqetësuar banorët dhe duke rrezikuar ambientin.
Ndërkohë, bizneset që nuk u prekën direkt nga zjarri, por nga nxehtësia e shkaktuar prej tij, kanë pësuar dëme më të vogla, të cilat po verifikohen nga autoritetet. Tregtarët kanë filluar të nxjerrin nga dyqanet mallin e mundshëm që ka shpëtuar nga flakët.
