Presidenti amerikan, Barack Obama, deklaroi se do t’i mbetet merak vetëm një gjë nga vizita e tij në Laos, pasi Shërbimi Sekret nuk do ta lejojë atë t’i hipë një elefanti, kur ai të vizitojë trashëgiminë kulturore të Luang Prabangut.
Obama tha se është shumë i nderuar që është bërë presidenti i parë amerikan që viziton vendin e vogël të Laosit dhe se është mirënjohës që do të ketë mundësinë të shijojë bukuritë e vendit aziatik.
“Unë do të kem mundësinë që të përjetoj nga afër disa nga trashëgimitë e Luang Prabangut”, tha ai në një fjalim në Sallën Kombëtare të Kulturës, në Vientiane, transmeton atsh.
“Më vjen keq vetëm për faktin se unë e di se ky qytet quhet vendi i një milion elefantëve, por shërbimi sekret nuk do të më lejojë të shëtis me një të tillë”, u shpreh Obama.
“Ndoshta do të kthehem kur unë nuk do të jam më president”, shtoi ai, përgatiti Koha. (b.an)
