Skënder Kurti, ish-trajneri i kombëtares së boksit, ka ndërruar jetë në spitalin Infektiv në Tiranë.
Kurti u raportua si viktima e pestë nga Koronavirus në Shqipëri me datë 23 mars, por Ministria e Shëndetësisë sqaroi se kishte pësuar vdekje klinike dhe po lufton ende për jetën.
Por pas 12 ditësh në gjendje shumë të rëndë, ish-trajneri i kombëtares ka ndërruar jetë. Skëndër Kurti ka luajtur me dhjetra ndeshja boksi brenda dhe jashtë vendit.
Ai cilësohej si një ndër boksjerët më të mirë në vend, kur ishte i ri.
Njoftimi zyrtar:
Ka ndërruar jetë sot në spitalin infektiv 61-vjeçari me inicialet S.K., i shtruar prej 20 ditësh në spital, në gjendje të rëndë, i intubuar. Më herët 61-vjeçari nga Tirana pësoi vdekje klinike dhe prej disa ditësh gjendja e tij ishte rënduar së tepërmi.
Pavarësisht përpjekjeve të mjekëve të Spitalit Infektiv në terapinë intensive, 61-vjeçari që vuante nga hipertensioni, nuk ia ka dalë të mbijetojë.
Ministria e Shëndetësisë dhe Mbrojtjes Sociale i shpreh ngushëllimet familjes së të ndjerit. Ministria e Shëndetësisë i kërkon qytetarëve të vijojnë të respektojnë masat e distancimit social.
Është po kaq e rëndësishme që masat e kontrollit të infeksionit të respektohen maksimalisht edhe brenda rretheve familjare, duke shmangur vizitat tek të afërmit për çdo lloj arsye, për të parandaluar transmetimin e COVID-19.
