Nga Skënder Minxhozi/
Përgjigja më e shpejtë dhe natyrisht më banale është kjo: do ta marrin, do ta lenë në burg derisa ta gjykojnë, e më pas… Zoti na ruajt më pas! Sepse Sokol Mjacaj nuk do ta ketë për herë të parë daljen para një trupe gjykuese për vrasje. Tani qe ai konfirmohet katërcipërisht si vrasësi i turistëve çekë, vrasja e çiftit Svatos-Kosinova duhet të ketë de facto dy të akuzuar: njërin penalisht, tjetrin moralisht. I akuzuari penal dihet. Është 20 vjeçari që shumica e shqiptarëve e kërkojnë të ndëshkuar sa më rëndë në këtë moment. Kurse i akuzuari moral i kësaj ngjarjeje që tronditi dy shtete në 48 orët e fundit, është pa më të voglin dyshim gjykatësi që e liroi pas pesë vitesh burgimi, një të dënuar për vrasjen e një të mituri. I cili, siç dëshmoi vdekja tragjike e dy të rinjve çekë ishte dhe mbetet një person me rrezikshmëri të lartë, që burgu s’ja paska ciflosur askund instiktin e marrjes së jetës.
Në ç’dorë do të bjerë kësaj rradhe Sokol Mjacaj? Nëse pyet rrugëve të Tiranës, Shkodrës, Ersekës apo Sarandës në këto orë, do të thonë me shumë gjasë se do të jetë një dorë e ngjashme me atë që e dënoi me pesë vjet burg në vitin 2010. Sepse në këtë vend besimi tek institucionet është i ulët, tejet i ulët, por ama besimi tek njëri prej komponentëve bazë të shtetit ligjor, drejtësisë, është i rrënuar. Totalisht i rrënuar.
