Nga Ardit Rada/
Në pamundësi për të gjetur lajmin e përditshëm në një të dielë plazhi si kjo e sotmja, fundjava ka sjellë para publikut përmes një televizioni vendsa një ‘shqetësim’ që detyrimisht duhet ta ndjejë edhe Presidenca (?).
E përmbledhur në pak fjalë, presidenti Bujar Nishani dhe zonja e tij po pushojnë për pak ditë në një hotel privat në Shëngjin, pasi sipas raportuesit të lajmit atij i është refuzuar qëndrimi në një rezidencë nga ana e Drejtorisë së Shërbimeve Qeveritare. Po sipas lajmit, në rezidencën e Dhërmiu dhe të Vlorës ka vajtur kryeministri dhe kreu i Kuvendit, ndërsa rasti raportohet si një skandal dhe absurd që ndodh për herë të parë në vend.
Në fakt, nga Presidenca ende nuk ka një reagim mbi këtë ‘përplasje titanësh’ të politikës apo shtetit tonë, por nëse kjo është një ndodhi e vërtetë, burimi duhet të jetë i hatërmbeturi dora vetë. Nga ana tjetër, qofshin të vërteta kryeneçësi të tilla ballkanase nga ana e qeverisë, do të ishte qesharak si sulm dhe i pajustifikueshëm kurrësesi.
Rasti i kancelares gjermane, Angela Merkel, emri i së cilës është lakuar si shembull nga i gjithë spektri politik shqiptar, duhet ndjekur dhe jo përdorur. E pra është pikërisht Merkel që çdo vit shkon në një hotel privat në jugun e Italisë me bashkëshortin dhe për publikun gjerman e botëror edhe kaq sa dinë është shumë për të.
I hatërmbeturi në fjalë dhe aq më pak ndonjë media, nuk ka asnjë arsye përse të shqetësohet sepse ndryshe nuk bëhet asgjë tjetër veçse rritet dyshimi dhe ajo ego ballkanase duke ngritur pyetjen: A është një president që i bën pushimet në hotel privat më pak i rëndësishëm sesa një i tillë që pushon privatisht?
Me apo pa të drejtë, qoftë edhe një inat i qeverisë me Presidencën, politika shqiptare duhet të bjerë njëherë e mirë dakord me parimin se rrobat e palara nuk duhet të dalin pazarit dhe se publiku nuk u ka asnjë borxh të mësojë në ditë pushimesh për ‘tangërllëqet e Hekuranëve’ te Rana e Hedhun apo në Jug qofshin .
