Liderët e vendeve të Ballkanit Perëndimor sot dhe nesër do të zbarkojnë në Tiranë në takimin e tretë rajonal mes këtyre vendeve. Por, në këtë takim nuk do të jetë e pranishme Kosova.
Sot do të zhvillohet takimi i tretë në kuadër të ‘mini-shengenit’ Ballkanik mes kryeministrit Rama, Zaev dhe Presidentit serb, Aleksandër Vuçiç.
Takimi i sotëm do të zhvillohet në Tiranë, ndërkohë Kosova ka njoftuar mospjesëmarrjen në këtë takim. Megjithëse ishte i ftuar, presidenti i Kosvës, Hashim Thaçi e ka refuzuar ftesën e kryeministrit shqiptar Edi Rama.
“Serbia ka kryer gjenocid kundër qytetarëve të Republikës së Kosovës dhe sot jo vetëm që mohon krimet e kryera, por vazhdon të mos e pranojë ekzistencën e shtetit tonë. Në një situatë të tillë, thirrjet dhe iniciativat për bashkëpunim rajonal janë krejtësisht të pakuptimta. Serbia dhe Bosnje Hercegovina nuk e njohin shtetin e Kosovës”, tha Hashim Thaçi.
Kryeministri Rama është një mbështetës i fortë i këtij procesi. Mbrëmjen e djeshme ai theksoi se ky projekt është një mundësi e artë për Shqipërinë dhe Kosovën që të heqin kufirin mes tyre dhe shtoi se mospjesëmarrja e kësaj të fundit e nxjerr humbëse politikën e Kosovës në sytë e vëllezërve amerikanë.
“Ne kishim rënë dakord që do bënim këtë samit në Durrës dhe përkon koncerti me një ditë përpara samitit, ku s’do jenë vetëm Presidenti i Serbisë dhe Maqedonisë së Veriut, por do të jenë dhe të tjerë. Do vijë nga SHBA, nuk e di nga Kosova. I dërguari special, Palmer, më ka kërkuar dy ftesa zyrtare, sepse do dërgojë dy persona të posaçëm nga DASH në mbështetje të këtij procesi”, tha Rama.
Takimi në Tiranë vjen pas dy takimeve të mëparshme të zhvilluara në Novi Sad të Serbisë dhe në Ohër të Maqedonisë së Veriut. Kosova e ka refuzuar pjesëmarrjen edhe në dy takimet paraprake. Me mbledhjen në Tiranë mbyllet cikli tripalësh i takimeve të liderëve të Ballkanit Perëndimor dhe pritet që ata të dalin me një vendimmarrje në lidhje me këtë proces. /a.r
