Pjesëtari i grevës së urisë dhe i lëvizjes studentore 25 vjet më parë, Shinasi Rama, i ftuar në emisionin Tonight Ilva Tare ka evidentuar rrezikun e mundshëm të përsëritjes së vitit të mbrapshtë 1997. Ai ka thënë se ngjarjet e atij viti mund të përsëriten nëse paria e Tiranës, siç i quan ai drejtuesit politik të vendit, nuk ndërgjegjësohen për veprimet e tyre në dëm të popullit.
Viti 1997 ka qenë një ngjarje për të cilin ne nuk kemi nxjerrë mësimin e duhur. Paria e Tiranës në vend që ta përdorte si një rrugë për të nxjerrë mësim, e përdori thjeshtë si një rrugë për të përfituar në maksimum dhe në ekstrem për vetveten. Kjo çoi në rebelimin popullor në vitin 1997 dhe do të çojë prapë në 2017, 2020.
Flisni për një rebelim të ngjashëm me vitin 1997?
Edhe më keq se në vitin 1997 sepse në 1997 kishim struktura oficerësh, struktura kuadrosh, ekzistonte një botë e nëndheshme, njerëzit kishin mbaruar shkollat dhe e njihnin njëri-tjetrin dhe ishin në gjendje të mbanin një kontroll mbi armët, depot etj. Kjo është e para. E dyta është dështimi i modelit ekonoik të parisë. Paria e Tiranës ia arriti ta shmangte rebelimin popullor për sa kohë që e lejoi popullin shqiptar të vidhte, të grabiste, të pasurohej pa mëshirë kundër gjithë shqiptarëve. Paria bëri ça deshte me shtetin, shqiptarët bënë çfarë deshën me vetveten, zunë toka, grabitën, tregtuan, mbollën drogë etj. Rruga e tretë është se këtu duhet të ketë një ndërgjegjësim të cilin paria duhet të jetë pjesë dhe të kuptojë që nuk mund të vazhdohet më me këtë punë. Zullumi këputet duke u trashur edhe zullumi ka ardhur në një pikë në të cilin vetë njerëzit që vetë njerëzit që drejtojnë, duhet të fillojnë të reflektojnë sepse po nuk u ndryshua sistemi ligjor, sistemi politik, marrëdhënia që ky shtet ka me popullin atëherë rrugët e para janë të pashmangshme.
