Partia Demokratike ka kërkuar nga SPAK që të nis hetimet lidhur me shembjen e pjesshme të rrugës Korçë–Ersekë, një aks i ri që ende nuk është inauguruar. Drejtuesja e departamentit antikorrupsion, në Partinë Demokratike, Marinela Ziu tha se kjo rrugë ka gllabëruar me miliona euro të qytetarëve dhe ende nuk është funksionale, përkundrazi po rrezikon jetën e tyre.
Sipas Ziut tenderat e dhëna për ndërtimin e dy lotëve të rrugës kanë fryrë vlerën e saj reale, ku janë tenderuar 5 milionë euro për kilometër.
“Shembja e rrugës Korçë–Ersekë ishte paralajmëruar prej kohësh por asnjë organ shtetëror nuk mori mundimin të vepronte për të parandaluar jo vetëm rrënimin e saj, por madje edhe ndonjë fatkeqësi njerëzore, duke qenë një nga rrugët më qarkullim të lartë në zonën jug-lindore, në të cilën papërgjeqshmërisht lejohet lëvizja e automjeteve pavarësisht se ende nuk është përfunduar dhe dorëzuar nga shoqëria zhvilluese. Përfundimi i kësaj rruge është premtuar nga vitit 2013, premtim që është ricikluar prej 10 vitesh, e megjithëse gllabëron miliona euro, jo vetëm që nuk përfundon por së fundmi edhe kjo rrugë “doli nga rruga” për shkak të cilësisë shumë të dobët të punimeve nga babëzia për të vjedhur, duke rrezikuar seriozisht shëndetin dhe jetën e qytetarëve.
Tenderimi i kësaj rruge është denoncuar prej vitit 2020 nga Partia Demokratike, për shkak të klientelizmit, vlerës së tejfryrë, përfitimit të saj në kufij 100% të fondit limit por edhe zvarritjes së përfundimit të saj. Dy tenderat e lotit të dytë të ndarë në dy pjesë janë fituar nga shoqëria A.N.K shpk, në pronësi të shtetasit Agim Kola, vëllai i ish-deputetit socialist Ndue Kola, një nga klientët e qeverisë që ka përfituar miliona euro kontrata publike, ndër të cilat edhe koncesioni 310 milionë euro i rrugës Milot–Balldre. Një tjetër projekt i lënë rrugëve për shkak të përfitimit në mënyrë klienteliste, e mbi të gjitha pa pasur fondet e duhura për ndërtim nga kompania përfituese, në të njëjtën skemë si tek inceneratorët, si dhe në mungesë të financimit të saj nga bankat.
Për lotin e dytë me një gjatësi 17 kilometra të rrugës Korçë–Ersekë janë paguar 50 milionë euro nga taksat e shqiptarëve, ku kompania fituese ka përfituar edhe 4 milionë euro shtesë për punime të paparashikuara. Madje abuzimi shkon edhe më tej në një nga pjesët e lotit të dytë të kësaj rruge, ku pavarësisht se ka pasur një projekt për 1 milion euro për kilometër, zbatimi i tij është zvarritur për ta ndryshuar dhe tenderuar për 5 milionë euro për kilometër, në një rrugë më një gjatësi vetëm 4 kilometër. SPAK duhet të nisë menjëherë hetimet për supervjedhjen me rrugën Korçë–Ersekë, për të cilën jo vetëm janë shpenzuar miliona euro për punime me cilësinë më të dobët, por tashmë po rrezikohet seriozisht edhe jeta dhe shëndeti i qindra qytetarëve të zonës jug-lindore,” shkruan Ziu në Facebook.
Traseja e rrugës Korçë-Erseke, e cila është në ndërtim, u shemb dy ditë më parë në vendin e quajtur ‘Qafa e Qarrit–Mollas’. Kantieri për ndërtim e rrugës së re është hapur në vitin 2020 dhe ARRSH-ja ende e ka marrë në dorëzim.
/a.r
