Të paktën 100 persona dyshohet se kanë humbur jetën si pasojë e një rrëshqitjeje dheu në një minierë ari të improvizuar në perëndim të Republikës Qendrore Afrikane, pranë kufirit me Kamerunin.
Ngjarja tragjike ndodhi të martën rreth orës 14:00, sipas kohës lokale, në një minierë ari në zonën e Zaboye, rreth 50 kilometra nga qyteti i Bamboua.
Sipas informacioneve të mbledhura nga burime lokale, një pjesë e minierës u shemb duke zënë poshtë dhjetëra minatorë dhe persona të tjerë që ndodheshin në zonë.
Operacionet e kërkim-shpëtimit kanë nisur menjëherë, ndërsa ekipet në terren po punojnë për të nxjerrë personat e bllokuar nën dhe.
Raportimet fillestare për numrin e viktimave kanë qenë të ndryshme. Më herët ishte raportuar për 33 persona të vdekur, ndërsa burime të tjera lokale kanë ngritur bilancin në të paktën 100 viktima.
Minierat artizanale të arit në këtë zonë njihen për kushtet e vështira dhe mungesën e standardeve të sigurisë, duke i bërë punëtorët veçanërisht të ekspozuar ndaj shembjeve dhe aksidenteve.
Autoritetet pritet të japin të dhëna të reja për numrin e viktimave dhe të personave të shpëtuar, ndërsa operacionet e kërkim-shpëtimit vijojnë.
