Kritikat për Lulzim Bashën në krye të Bashkisë së Tiranës kanë ardhur nga brenda koalicionit të opozitës. Ishte kreu i LZHK-së Dashamir Shehi i cili u treguar si gjithnjë mjaft i drejtpërdrejtë kur kritikoi keq administrimin dhe lënien pas dore të kryeqytetit nga ana e kryebashkiakut.
Duke folur gjatë takimit hapës të fushatës elektorale të LZHK-së, në prani edhe të kandidatit të opozitës Halim Kosova, Shehi tha se Tirana këto vite është lënë pas dore.
“Të gjithë ne që jemi qytetarë të Tiranës, kemi dhe një Tiranë tjetër të vogël secili, një Tiranë para shtëpisë vet, midis pallateve, një Tiranë për të cilën fatkeqësisht nuk është treguar kujdesi i duhur. Ka ardhur dita ta shohim qytetin tonë, ti masim trotuaret, të shohim a ja vlen të hapim 4 farmaci, apo 4 kafe ngjitur me njëra-tjetrën. A ja vlen që avllia e njërit që do të zgjerojë guzhinën të zërë trotuarin e gjysmës së rrugicës. Prandaj them që ky qytet ka nevojë për administratë, që inspektori i bashkisë të mbërrij cep më cep të qytetit, ta shoh, të tentojmë dhe ne si gjithë bota, ta ilustrojmë një herë qytetin tonë”, tha ai.
Shehi theksoi edhe problemin e një qyteti të ndotur siç është Tirana, jo vetëm ajri por edhe fizikisht.
“Dhe e dyta do shkojmë ta pastrojmë. Absolutisht do shkojmë ta pastrojmë. Se ky qytet jo vetëm që është ndotur nga ajri, por është ndotur edhe fizikisht”, u shpreh Kreu i LZH.
Sipas Shehit Tiranës duhet t’i rikthehet jeta kulturore dhe të kthehet në një qytet të denjë Evropian, e jo siç e cilësoi ai, vetëm për bukë me djathë dhe ujë.
“Qyteti duke u shpërndarë në këtë farë mënyre, shpesh herë i ka munguar jeta, jeta kulturale, i ka munguar drita në periferi, i ka munguar piaca në periferi. Dhe të rinjtë turren natën drejt qendrës, turren me pa dritë, me pa jetë, me pa makinat e bukura. Ndaj ka ardhur dita që qytetit ti afrojmë jetë kulturale, ti afrojmë kudo dritë dhe mundësi, që të marrësh gruan prej dore dhe të pish një kafe, që të vij dhe të shkoj te kinemaja afër. Domethënë ka ardhur dita që ta quajnë vetëm tamam qytetar të Europës dhe të mendojmë dhe për jetë kulturale sepse nuk jetohet vetëm me bukë me djathtë dhe uji”, përfundoi Shehi.
