Rusia përbën kërcënimin më të madh për sigurinë kombëtare të SHBA-së, theksoi sot shefi i shtabit të përgjithshëm të ushtrisë, gjenerali Joseph Dunford, i cili mbështeti gjithashtu furnizimin e Ukrainës me armë.
“Rusia përbën kërcënimin më të madh për sigurinë tonë kombëtare”, theksoi gjenerali, Dunford gjatë seancës dëgjimore të komisionit të forcave të armatosura të Senatit, në kuadër të procesit për konfirmimin parlamentar.
Gjenerali, Dunford u emërua nga Shtëpia e Bardhë për të pasuar shefin aktual të shtabit të përgjithshëm, Martin Dempsey. Ai do të marrë funksionet e tij pas verës, pasi të konfirmohet nga Senati.
”Rusia është një fuqi bërthamore, që ka shkelur sovranitetin e një vendi të pavarur, Ukrainës, nga aneksimi i Krimesë”, theksoi gjenerali, Dunford.
“Sjellja e saj nuk është asgjë më pak se alarmante”, nënvizoi ai duke shtuar se ishte e rëndësishme që ushtarët amerianë dhe rusë të mbajnë një marrëdhënie dypalëshe, për të shmangur incidentet dhe keqkuptimet.
I graduari më i lartë i mundshëm i ushtrisë amerikane mbështeti gjithashtu furnizimin me armë antitank në Ukrainë, një hap që SHBA-ja për momentin e ka refuzuar.
“Pa këtë lloj mbështetjeje, ata nuk do të jenë në gjendje të mbrohen kundër një agresioni rus”, theksoi ai.
Mes kërcënimeve të tjera të mëdha apo shqetësimeve që peshojnë në sigurinë kombëtare amerikane, gjenerali Dunford citoi Korenë e Veriut, grupin e Shtetit Islamik dhe Kinën.
