Shef i Shtabit të Përgjithshëm të FA, gjeneral brigade Bardhyl Kollçaku, me ftesë të shefit të Shtabit të Përgjithshëm të Mbrojtjes Kombëtare të Greqisë, gjeneral Christos Christodoulou, zhvilloi më 30 gusht 2019, një vizitë zyrtare në Greqi.
Fillimisht, ai u prit në takim nga homologu i tij grek, me të cilin u diskutua për mjedisin e sigurisë në vendet respektive, Ballkan e më gjerë, për bashkëpunimin dypalësh në fushën ushtarake dhe prespektivën e rritjes dhe forcimit të këtij bashkëpunimi.
SHSHPFA vlerësoi kontributin dhe mbështetjen e Forcave të Armatosura greke në procesin e integrimit të Shqipërisë në strukturat euroatlantike si dhe rritjen e kapaciteteve operacionale të tyre.
Gjatë vizitës, shefi i Shtabit të Përgjithshëm të FA gjeneral brigade Bardhyl Kollçaku u prit në takim edhe nga ministri i Mbrojtjes së Greqisë, Nikolaos Panagiotopoulous, i cili vlerësoi klimën e bashkëpunimit në fushat politike dhe ushtarake ndërmjet dy vendeve si dhe kontributin e faktorit shqiptar në ndërtimin e Greqisë.
Të dy palët theksuan se, në kuadër të fqinjësisë së mirë që ekziston ndërmjet dy vendeve, nevojitet të rritet e thellohet më tej edhe bashkëpunimi në fushën e Mbrojtjes.
